Як вынікае з афіцыйнай статыстыкі, у Беларусі на 10 тысяч чалавек прыходзіцца 45,5 практыкуючых лекараў і 122,3 — сярэдніх мэдычных працаўнікоў.
Паводле Белстату, у Беларусі колькасьць лекараў практыкаў большая, чым у Швайцарыі, Баўгарыі, Літве і Ісьляндыі, а малодшага мэдпэрсаналу — чым у Швайцарыі, Нідэрляндах, Аўстрыі і Ісьляндыі.
Згодна з статыстыкай, па выніках 2024 году ў Беларусі працавалі 553 лякарні і 1 394 амбуляторна-паліклінічных устаноў.
У лютым 2025 году ў агульнарэспубліканскай базе вакансій і рэзюмэ было 189 982 свабодных працоўных месцаў. У лістападзе 2024-га такіх вакантных месцаў было 168 517, ці на 11% меней.
Ужо некалькі гадоў у Беларусі пацягваецца праблема дэфіцыту мэдыкаў, летась у чэрвені шукалі адразу 7000 лекараў.
Цяпер у агульнай базе вакансій 5522 месцы для лекараў. Напрыклад, у Баранавіцкую лячэбна-кансультацыйную паліклініку трох лекараў шукалі зь ліпеня 2023 году. Трэба доктар агульнай практыкі, тэрапэўт, лор. Гатовыя плаціць да 1200 рублёў.
Гэта адзін з самых нізкіх заробкаў. Звычайна прапануюць каля 2000 рублёў. Напрыклад, стаматоляга ў Менску шукалі на заробак у 1700 рублёў, а лекару ў вайсковай частцы Лепельскага раёну гатовыя былі плаціць да 3 302 рублёў.
У сакавіку 2025 году міністар аховы здароўя Беларусі Аляксандар Хаджаеў заявіў, што заробкі мэдыкаў надалей растуць і яны «абсалютна годныя».
«На цяперашні момант сярэдні заробак лекара ў нашай краіне 3189 рублёў. Гэта паказьнік, якім мы можам ганарыцца. Мы імкнемся дасягнуць мэтавага паказьніку 150% ад сярэднерэспубліканскага заробку, і сёньня мы блізкія да яго выкананьня», — працытавала выданьне «Люстэрка» Аляксандра Хаджаева зь ягонага інтэрвію тэлеканалу СТВ.
Паводле яго, дзякуючы падтрыманьню ўладаў, у тым ліку кавідным надбаўкам, лекары ня толькі ня страцілі ў даходах, але і надалей атрымлівалі вышэйшыя заробкі. Ён адзначыў, што цяпер узровень заробку лекараў у Беларусі застаецца на першым месцы сярод працаўнікоў сацыяльнай сфэры.
Выданьне нагадала, што сярэдні заробак да сплаты падаткаў у ахове здароўя ў студзені 2025 году склаў 2049,1 рубля, што на 118,6 рубля менш у параўнаньні зь сьнежнем 2024 году (2167,7 рубля). Лекары ў студзені атрымалі 3793,8 рубля, што перавысіла паказьнікі мінулага месяца, калі іхны сярэдні заробак склаў 3723,2 рубля.
Форум