Траім жыхарам Менску выставілі абвінавачаньне за «здраду дзяржаве» за сацыялягічныя дасьледаваньні. Згодна з матэрыяламі справы, 42-гадовы мянчук за матэрыяльную ўзнагароду падрыхтаваў для адной з арганізацый дасьледаваньне, якое зьмяшчае «заведама ілжывыя зьвесткі аб палітыцы ў галіне аховы здароўя, у частцы захадаў у барацьбе з каранавіруснай інфэкцыяй».
Як даведаўся праваабарончы цэнтар «Вясна», у аналягічным злачынстве вінавацяць яшчэ дзьвюх жанчынаў. Гэта мянчанкі (37 і 43 гадоў), якія за ўзнагароджаньне праводзілі сацыялягічнае дасьледаваньне, якое датычылася наяўнасьці пераваг сярод грамадзян у разьвіцьці краіны праз інтэграцыю з краінамі Эўрапейскага зьвязу.
Як гавораць сілавікі, сьледчыя выявілі, што шкода, прычыненая дзяржаве ў агульнай суме склала больш за 186 тысяч беларускіх рублёў. На гэты момант шкоду кампэнсавалі ў поўным памеры.
Дзеяньні абвінавачаных кваліфікавалі па ч. 1 арт. 356 КК (здрада дзяржаве) і ч. 2 арт. 243-3 КК (ухіленьне ад выплаты страхавых узносаў, якое прывяло да прычыненьня шкоды ў асабліва буйным памеры).
Абвінавачаныя перабываюць пад арыштам у чаканьні суду.
Форум