Пра тое, што ягоная партыя запрасіла Ульрыка Зінгера ў Беларусь, паведаміў прэс-службе Палаты прадстаўнікоў Нацыянальнага сходу кіраўнік ЛДПБ, намесьнік старшыні пастаяннай камісіі ў міжнародных справах ніжняй палаты парлямэнту Алег Гайдукевіч.
Адзначаецца, што Гайдукевіч узначаліў групу беларускіх дэпутатаў на праведзенай 3 красавіка ў Менску сустрэчы зь Зінгерам.
Як гаворыць сам Гайдукевіч, мэтай візыту нямецкага дэпутата зьяўляецца «разьвіцьцё адносін паміж Беларусьсю і Нямеччынай, Эўрапейскім зьвязам».
Прыезд Зінгера ў Беларусь нібыта «пацьвярджае тое, што ізаляцыя Беларусі — вялікі міт, у які ня вераць і самі эўрапейцы».
Прэс-служба Палаты прадстаўнікоў назвала дэпутата ад ультраправай партыі «прыхільнікам традыцыйных сямейных каштоўнасьцяў, прыпыненьня некантраляванай міграцыі і ўмацаваньня кантролю на межах Эўразьвязу, аднаўленьня камунікацый па дастаўцы энэргарэсурсаў для нівэляваньня працэсаў дэіндустрыялізацыі Нямеччыны».
Таксама Зінгер выступае за зьняцьце санкцый супраць Беларусі.
Міністэрства замежных спраў Нямеччыны, камэнтуючы беларускай агенцыі «Позірк» інфармацыю пра візыт Зінгера ў Менск, адзначыла, што «фэдэральны ўрад рашуча асудзіў сыстэмныя рэпрэсіі ў Беларусі», і «гэта стасуецца таксама парлямэнцкіх выбараў у 2024 годзе, якія прайшлі ў атмасфэры страху».
Партыя «Альтэрнатыва для Нямеччыны» зьяўляецца праварадыкальнай. Яна выступае супраць мігрантаў і адносіцца да разраду эўраскептычных, падтрымлівае расейскую палітыку і асабіста кіраўніка Расеі Ўладзіміра Пуціна, а таксама ягонага хаўрусьніка ў Беларусі Аляксандра Лукашэнку. У Саксоніі мясцовую арганізацыю партыі суд прызнаў экстрэмісцкай арганізацыяй. Таксама прарасейскую палітыку ў Нямеччыне вядзе радыкальна левы «Альянс Сары Вагенкнэхт».
Раней журналісцкае расьсьледаваньне паказала, што дэпутат ад AfD якраз ад фэдэральнай зямлі Саксонія Ёрг Дорнаў мае бізнэс у Беларусі. На ягонай плянтацыі цыбулі пад Лідай працавалі палітвязьні. Ягоная кампанія «Цыбулька-Бел» падпісала ўгоду зь Лідзкім ЦІП.
Пра свой бізнэс у Беларусі Ёрг Дорнаў адкрыта не расказваў, пакуль да зьвестак не дабраліся журналісты. Як паведамляла выданьне welt.de, дэпутат парушыў патрабаваньне раскрываць інфармацыю, бо не паведаміў у сваёй дэклярацыі аб прадпрыемстве ў Беларусі. За гэта яго аштрафавалі на 20 862 эўра.
Паводле выданьня, Дорнаў «некалькі разоў сустракаўся з прыхільнікамі беларускага дыктатара Аляксандра Лукашэнкі, аднак утаіў інфармацыю пра гэта».
Форум