У Белгідрамэце паведамілі, што першы вясновы месяц 2025 году стаў выключна цёплым і разам з сакавіком 2007 году заняў першае месца ў тэмпэратурнай ярархіі ад самага цёплага да самага халоднага, пачынаючы з 1945 году.
Як адзначаецца ў паведамленьні Белгідрамэту, сярэдняя тэмпэратура паветра ў Беларусі склала +5,2°С, што вышэй за кліматычную норму на 4,4°С.
Тэмпэратурная анамалія закранула ўсю тэрыторыю краіны. Найбольшыя адхіленьні ад кліматычнай нормы зафіксавалі ў Магілёўскай і Гомельскай вобласьцях (4,6°С у сярэднім па кожнай вобласьці), найменшыя — у Віцебскай, Менскай і Берасьцейскай (4,3°С).
Колькасьць ападкаў у сярэднім у Беларусі была блізкая да кліматычнай нормы. Выпала 37 мм ападкаў, што склала 96% нормы.
Згодна з паведамленьнем Белгідрамэту, на станцыі Віцебск 5 сакавіка зарэгістравалі навальніцу з градам дыямэтрам да 6 мм, а 12 сакавіка аналягічную зьяву зафіксавалі на станцыі Жыткавічы, град там быў дыямэтрам да 3 мм.
«Град у сакавіку выключна рэдкая зьява, а ў Віцебску і Жыткавічах яе зарэгістравалі ўпершыню. За ўсю гісторыю мэтэаназіраньняў адзначаныя адзінкавыя выпадкі выпадзеньня граду ў некаторых пунктах назіраньняў. Месцамі адзначалася ўзмацненьне ветру парывамі да 15 м/с і больш. Максымальная хуткасьць ветру (22 м/с) зарэгістраваныя на станцыі Горкі 24 сакавіка», — паведамілі ў Белгідрамэце.
Форум