У час дэбатаў парлямэнтары расказвалі асабістыя гісторыі пра тое, ці варта Эўразьвязу падтрымаць журналістаў, калі ЗША канчаткова адмовяцца іх фінансаваць.
«Калі я хадзіў у школу ў камуністычнай Румыніі, мае бацькі амаль кожны дзень нагадвалі мне, каб я нікому не расказваў, што мы слухаем „Свабодную Эўропу“», — сказаў з парлямэнцкай трыбуны эўрадэпутат ад Румыніі з фракцыі «Абнавіць Эўропу» Дан Барна.
«Я нават помню, а якой гадзіне мая бабуля спрабавала злавіць вольнае слова скрозь трэскат прымача», — падзялілася эўрадэпутат ад Літвы, фракцыя «Эўрапейская народная партыя» Раса Юнкевічэне.
«Я слухаў яго разам з бацькамі з амаль рэлігійнай глыбокай павагай. Пазьней я на працягу сямі гадоў працаваў карэспандэнтам Радыё Свабодная Эўропа», — падзяліўся эўрадэпутат ад Румыніі, фракцыя «Эўрапейскія кансэрватары і рэфармісты» Клаўдыу-Рычард Тырзю.
Асабістымі гісторыямі пра Радыё Свабода і Голас Амэрыкі ў сэсійнай залі Эўрапарлямэнту падзяліліся больш за дзясятак дэпутатаў. Яны настойвалі: Эўразвяз павінен дапамагчы Радыё Свабода зь фінансаваньнем, бо ЗША замарозілі фонды для гэтага мэдыя.
Супраць выказаліся дэпутаты з ультраправых палітычных групаў. Яны называлі Радыё Свабода «інструмэнтам амэрыканскай прапаганды» і казалі пра недахоп сродкаў.
«Навошта нам фінансаваць стары перажытак халоднай вайны, калі нашыя нацыянальныя патрэбы вымагаюць канкрэтных інвэстыцый?» — задавала пытанне эўрадэпутат ад Францыі з фракцыі «Патрыёты Эўропы» Віржыні Жарон.
Дэпутат Эўрапарлямэнту ад ультраправай партыі «Альтэрнатыва для Нямеччыны» Мары Хан, заявіла, што RFE/RL «можа фінансаваць сябе сама», і дадала, што СМІ не павінны фінансавацца эўрапейскімі інстытутамі.
«У Нямеччыне расьце беднасьць сярод пажылых людзей, і пэнсіянэрам, якія працавалі ўсё сваё жыцьцё, зараз даводзіцца зьбіраць бутэлькі. А тут людзі падумваюць укласьці яшчэ больш грошай у нібыта незалежны мэдыярэсурс», — казала яна.
Славацкі дэпутат Эўрапарлямэнту Мілан Угрык, які ўваходзіць у тую ж фракцыю «Эўропа сувэрэнных нацый», што і Мары Хан, заявіў, што ЭЗ замест гэтага павінен дапамагчы фэрмэрам Славаччыны змагацца зь яшчурам сярод буйной рагатай жывёлы.
Аднак большасьць, дзьве траціны ўдзельнікаў дэбатаў выказаліся за захаваньне Радыё Свабода як важнага мэдыя, якое дае дакладную інфармацыю.
«Прастора дэмакратыі, асабліва на эўрапейскім кантынэнце, зьяўляецца нашай мэтай у бясьпецы. Таму ЭЗ разам са сваімі партнэрамі павінен мець плян, як захаваць распаўсюд свабоды слова», — сказала Раса Юнкевічэне.
«Давайце падтрымаем тых, хто рызыкуе ўсім, каб паведаміць праўду. Ня толькі словамі, але і дзеяньнямі, фінансаваньнем і салідарнасьцю. Бо абарона СМІ — гэта перш за ўсё абарона дэмакратыі», — падкрэсьліў эўрадэпутат ад Літвы, фракцыя «Зялёныя» Віргініюс Сінкевічус.
Аляксандар Вондра, вядомы дысыдэнт у камуністычнай Чэхаславаччыне, а цяпер дэпутат Эўрапарлямэнту ад правага крыла партыі «Эўрапейскія кансэрватары і рэфармісты», заявіў, што радыёстанцыя дапамагае распаўсюджваць інфармацыю ў рэпрэсіўных краінах, такіх як Іран, Беларусь і Расея, і заклікаў Эўрапейскі зьвяз зрабіць свой унёсак у дасьледаваньне радыёстанцыі.
«Давайце будзем адкрытыя для фінансаваньня таксама са сродкаў ЭЗ і знойдзем пагадненьне аб тым, у якой форме гэта будзе ажыцьцяўляцца», — сказаў дэпутат у камэнтары RFE/RL.
Эўракамісар у пытаньнях пашырэньня Марта Кос падсумавала дэбаты заклікам абараніць Радыё Свабода, каб «не рабіць падарунак аўтакратам па ўсім сьвеце». Гэта словы з прамовы кіраўніка эўрапейскай дыпляматыі Каі Калас, якая на дэбатах не прысутнічала, але яе пазыцыю агучыла Марта Кос.
«У гэтым сьвеце, дзе свабода высьлізгвае з нашых рук, відавочна, што мы павінны прыняць новы падыход да свабоды СМІ, у тым ліку ў Эўрапейскім зьвязе», — сказала яна.
У час пленарнага паседжаньня, якое завершыцца 3 красавіка, рэзалюцыя па дэбатах ня будзе выносіцца на галасаваньне, паведамляе рэдактар Радыё Свабода/Радыё Свабодная Эўропа ў эўрапейскіх пытаньнях Рыкард Юзьвяк. Аднак гэта можа адбыцца на пазьнейшым этапе, бо некалькі службовых асобаў Эўрапейскага парлямэнту паведамілі радыё, што працягнуць сачыць за сытуацыяй.
Форум