Па стане на 1 красавіка ў Беларусі сама меней 1202 палітвязьні, прызнаныя праваабарончай супольнасьцю. Рэальная колькасьць зьняволеных паводле палітычных матываў у краіне можа быць большай.
Палітзьняволены анархіст Мікола Дзядок меў выйсьці на волю 4 красавіка, але яго перавялі ў СІЗА № 1 па новай крымінальнай справе, паведамляе прысьвечаны палітвязьню тэлеграм-канал.
«Стала вядома, што Міколу перавялі ў СІЗА № 1 у Калядзічах з прычыны новай крымінальнай справы. На жаль, іншых падрабязнасьцяў няма. Няма таксама навінаў наконт ужо адкрытай на яго справы па 411-ым артыкуле. Мікола мусіў выйсьці на волю 4 красавіка 2025 году», — гаворыцца ў паведамленьні.
У верасьні 2024 году стала вядома, што на Міколу Дзядка завялі новую крымінальную справу завялі паводле арт. 411 Крымінальнага кодэксу — «Злоснае непадпарадкаваньне патрабаваньням адміністрацыі папраўчай установы». Па гэтым артыкуле прадугледжанае пазбаўленьне волі на тэрмін ад аднаго да трох гадоў. Артыкул дазваляе бясконца працягваць тэрмін зьняволеньня палітвязьням.
Мікалай Дзядок — блогер, які піша і здымае відэа на грамадзка-палітычныя тэмы, журналіст, актывіст анархісцкага руху.
Затрымалі яго 11 лістапада 2020 году. Пры затрыманьні Дзядка моцна зьбілі, у вочы яму распылілі пярцовы газ. Сілавікі гвалтам прымусілі яго зьняцца на камэру для роліку МУС. Дзядок на судзе заявіў, што пасьля затрыманьня яго катавалі — зьбівалі дубінкай, білі электрашокерам па пятках, пагражалі згвалтаваньнем.
10 лістапада 2021 году Дзядка асудзілі на 5 гадоў зьняволеньня, прызнаўшы вінаватым паводле трох артыкулаў:
- арт. 342 КК (Арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх),
- арт. 361 КК (Заклікі да дзеяньняў, скіраваных на прычыненьне шкоды нацыянальнай бясьпецы Беларусі),
- арт. 295-3 КК (Незаконныя дзеяньні ў дачыненьні да прадметаў, дзеяньне якіх заснаванае на выкарыстаньні гаручых рэчываў).
Мікалай Дзядок не прызнаў віну па ніводным артыкуле.
Пазьней пакараньне ўзмацнілі і перавялі палітвязьня на турэмны рэжым. Паводле праваабаронцаў «Вясны», увесь час у зьняволеньні на яго чыняць ціск.
Агулам Мікола Дзядок знаходзіцца ў зьняволеньні ўжо больш за 4 гады.
Форум