За мінулыя суткі работнікі Палескага лясгасу пры дапамозе сыстэмы дыстанцыйнага назіраньня выявілі пяць выпадкаў загараньня сухой расліннасьці на заліўных землях Прыпяці, паведамілі ў Мінлясгасе. Ачагі ўзгараньяў атрымался апэратыўна лякалізаваць і ліквідаваць.
Каля вёскі Краі (Асіповіцкі раён Магілёўскай вобласьці) працягваюць тушыць тарфяны пажар, вынікае з апэратыўнай зводкі Міністэрства надзвычайных сытуацыяў, піша Позірк.
«Для ліквідацыі пажару задзейнічана 13 адзінак тэхнікі і 40 чалавек, з іх 10 адзінак тэхнікі і 35 работнікаў МНС, — адзначае ведамства. — Тушэньне ўскладняецца цяжкапраходнымі ўчасткамі мясцовасьці, адсутнасьцю натуральнай вільготнасьці і вялікай глыбінёй заляганьня торфу. Пажар лякалізаваны, па стане на 06:00 10.03.2025 плошча пажару складае 0,2 га».
Паводле МНС, з 6:00 9 сакавіка да 6:00 10 сакавіка ў Беларусі зьліквідавана 10 тарфяных пажараў на агульнай плошчы 2,645 гэктара. Акрамя таго, за гэты ж час патушана 245 пажараў травы і хмызьняку (39,711 га) і 18 лясных пажараў (13,461 га).
Больш за ўсё лясных пажараў ліквідавана ў Берасьцейскай вобласьці — 9; у Гомельскай — 4, Менскай — 3, Горадзенскай — 2.
«У сувязі з ростам колькасьці загараньняў у прыродных экасыстэмах Брагінскае, Ельскае, Жыткавіцкае, Лельчыцкае, Мазырскае і Петрыкаўскае зьвёны Гомельскай тэрытарыяльнай падсыстэмы ДСНС, на падставе распараджэньняў адпаведных райвыканкамаў, знаходзяцца ў рэжыме павышанай гатоўнасьці функцыянаваньня», — заяўляе МНС.
9 сакавіка міністэрства таксама заявіла пра ліквідацыю 17 лясных пажараў.
Забароны на наведваньне лясоў уведзеныя ў 18 раёнах Беларусі, паведаміла БелТА са спасылкай на інтэрактыўную карту Міністэрства лясной гаспадаркі.
Забароны ўведзены ў Баранавіцкім, Бярозаўскім, Берасьцейскім, Ганцавіцкім, Драгічынскім, Жабінкаўскім, Янаўскім, Івацэвіцкім, Камянецкім, Кобрынскім, Лунінецкім, Ляхавіцкім, Маларыцкім, Пінскім, Пружанскім, Столінскім раёнах Берасьцейшчыны, а таксама ў Веткаўскім і Петрыкаўскім раёнах Гомельшчыны.
Форум