Прэзыдэнтка Малдовы не прыняла даверчыя граматы ад пасла Расеі

05 сакавік 2025, 21:10

Настоящее время

Прэзыдэнтка Малдовы Мая Санду не прыняла даверчыя граматы ад пасла РФ Алега Азёрава, прызначанага летась ў верасьні. У МЗС РФ 5 сакавіка выклікалі пасла Малдовы і ўручылі яму ноту з патрабаваньнем растлумачыць «прычыны парушэньня» палажэньняў Венскай канвэнцыі аб дыпляматычных зносінах.

У расейскім зьнешнепалітычным ведамстве заявілі, што паслу Малдовы ў Маскве «выражана зьдзіўленьне» тым, што Азёраў усё яшчэ не ўручыў даверчыя граматы Санду.

У лютым 2025 года Майя Санду заявіла, што даверчыя граматы не былі прынятыя з прычыны «непаважлівых заяў» расейскіх афіцыйных асоб.

«Нельга запрашаць прадстаўніка [Расеі] для ўручэньня даверчай граматы, калі афіцыйныя асобы ў Маскве робяць такія непаважлівыя заявы аб Малдове. Гэта сьведчыць аб непавазе Крамля да нашай краіны, непавазе сувэрэнітэту і тэрытарыяльнай цэласнасьці», — сказала яна (цытата па NewsMaker).

Амбасадар РФ Алег Азёраў у МЗС Малдовы

Кіраўнік МЗС Малдовы Міхай Папшой 21 лютага паўтарыў словы Санду, камэнтуючы BBC, чаму даверчыя граматы не былі ўручаны паслом РФ.

Ён сказаў, што былі «дыскусіі» і «намеры», але, паводле яго слоў, калі расейскія афіцыйныя прадстаўнікі «выліваюць чарговую порцыю вельмі недружалюбнага кантэнту ў адрас Малдовы», — «гэта не спрыяе такому рашэньню».

Мая Санду, адказваючы на пытаньне аб тым, ці будзе ўручэньне, сказала, што адміністрацыя прэзыдэнта Малдовы пазьней вырашыць, калі запрасіць амбасадара.

Алег Азёраў знаходзіцца ў Кішынэве з кастрычніка 2024 года. Да ўручэньня даверчых грамат дыппрадстаўнік не лічыцца афіцыйна прыступіўшым да выкананьня сваіх абавязкаў.