У Пінску суд, які адбыўся ў вайсковым камісарыяце, прысудзіў месяц арышту двум хлопцам, якія ўхіляліся ад прызыву

У Пінску ў памяшканьні вайсковага камісарыяту прайшоў суд над маладым чалавекам, які ўхіляўся ад прызыву ў войска.

Як адзначаецца ў матэрыяле, апублікаваным тэлерадыёкампаніяй «Пінск», малады чалавек на судовым пасяджэньні паведаміў, што пазьбягаў прызыву, бо баяўся адпраўкі на службу на мяжу з Украінай.

Справу разглядаў старшыня суда Пінскага раёну і горада Пінску Іван Корэц. Ён паведаміў, што цяпер ухіленьне ад службы ў войску зьяўляецца крымінальным злачынствам, таму не прадугледжвае такой санкцыі, як штраф.

Адвакат прасіў суд улічыць зьмякчальныя абставіны свайго падабароннага Сьвідаровіча — сталую працу, прызнаньне віны, першае абвінавачаньне ў крымінальным злачынстве. У выніку суд вынес пастанову аб арышце маладога чалавека на адзін месяц.

У матэрыяле адзначаецца, што раней аналягічнае пакараньне суд вынес яшчэ аднаму хлопцу, які ўхіляўся ад прызыву ў войска.

Раней праваабаронцы называлі некалькі выпадкаў, калі за ўхіленьне ад прызыву ў войска ў Беларусі выносілі пакараньне ў выглядзе абмежаваньня волі з накіраваньнем у папраўчую ўстанову адкрытага тыпу («хімія») тых, каго затрымлівалі на мяжы.

ГЛЯДЗІЦЕ ТАКСАМА:

Беларуса затрымалі ў Маскве, вярнулі на радзіму і аштрафавалі за ўхіленьне ад вайсковай службы

ГЛЯДЗІЦЕ ТАКСАМА:

Жыхара Горадні асудзілі за ўхіленьне ад войска. Раней яго затрымалі па вяртаньні з-за мяжы