У Балтыйскім моры ў эканамічнай зоне Швэцыі каля вострава Готлянд пашкоджаны яшчэ адзін кабэль, які забясьпечваў сувязь паміж Фінляндыяй і Нямеччынай.
Як паведаміла швэдзкае выданьне SVT News, гэтую інфармацыю пацьвердзілі ў Берагавой ахове і ў пракуратуры, якая пачала папярэдняе расьсьледаваньне.
Інцыдэнт, імаверна, адбыўся ўвечары 20 лютага.
Прэм’ер-міністар Швэцыі Ульф Крыстэрсан паведаміў, што атрымаў інфармацыю аб гэтым інцыдэнце.
«Мы вельмі сур’ёзна ставімся да ўсіх паведамленьняў аб магчымым пашкоджаньні інфраструктуры ў Балтыйскім моры. Як я ўжо казаў раней, іх варта разглядаць у сьвятле сур’ёзнай сытуацыі ў сфэры бясьпекі», — напісаў швэдзкі прэм’ер на сваёй старонцы ў сацыяльнай сетцы Х.
Сёлета ў студзені ля берагоў Швэцыі пашкоджаньні атрымаў камунікацыйны кабэль, што забясьпечваў сувязь па маршруце Вэнтсьпілс (Латвія) — Готлянд (Швэцыя). Пасьля гэтага інцыдэнту Нацыянальная апэратыўная група ўзяла штурмам судна Vezhen праз падазрэньне ў дывэрсіі. Але праз тыдзень швэдзкае сьледзтва прыйшло да высновы, што дывэрсіі не было. Аднак у Латвіі расьсьледаваньне працягваецца і паліцыя спрабуе высьветліць, ці быў кабэль пашкоджаны наўмысна.
- У лістападзе 2024 году быў пашкоджаны кабэль паміж Швэцыяй, Літвой, Фінляндыяй і Нямеччынай.
- У кастрычніку 2023 году судна
Newnew Polar Bear пашкодзіла газаправод Balticconnector і некалькі кабэляў. - У канцы сьнежня 2024-га быў пашкоджаны электрычны кабэль Estlink 2 і чатыры тэлекамунікацыйныя кабэлі ў Фінскім заліве.
- Мяркуюць, што да гэтых пашкоджаньняў мае датычнасьць Расея і яе танкеры.
- 7 студзеня стала вядома, што NATO накіруе да 10 караблёў для аховы падводнай інфраструктуры ў Балтыйскім моры. Паўночнаатлянтычны альянс вырашыў узмацніць сваю прысутнасьць у гэтым моры на просьбу Фінляндыі і Эстоніі пасьля пашкоджаньняў падводных кабэляў, якія адбыліся апошнім часам.
Форум