Лінкі ўнівэрсальнага доступу

Стаў вядомы памер мыта, якое Эўракамісія прапануе ўвесьці на сельгаспрадукцыю і азотныя ўгнаеньні зь Беларусі і Расеі


Будынак Эўракамісіі ў Брусэлі, архіўнае ілюстрацыйнае фота
Будынак Эўракамісіі ў Брусэлі, архіўнае ілюстрацыйнае фота

Ад вартых даверу крыніц у Брусэлі Свабодзе стала вядома, якое мыта Эўракамісія прапануе ўвесьці на шэраг тавараў сельскагаспадарчай прадукцыі і азотныя ўгнаеньні зь Беларусі і Расеі. Прыняцьце новых абмежаваньняў чакаецца ў бліжэйшыя тыдні.

28 студзеня Эўракамісія зацьвердзіла прапанову аб увядзеньні мыта на шэраг сельскагаспадарчых тавараў зь Беларусі і Расеі, а таксама на некаторыя азотныя ўгнаеньні. Мэта прапановы — зьнізіць залежнасьць ад імпарту з Расеі і Беларусі. Такі імпарт, асабліва ўгнаеньняў, робіць ЭЗ уразьлівым для патэнцыйных прымусовых дзеяньняў з боку Расеі і, такім чынам, становіць небясьпеку для харчовай бясьпекі ЭЗ, гаварылася ў прэс-рэлізе.

Паводле інфармацыі Свабоды, плянуецца павышэньне мыта на сельскагаспадарчыя тавары з 0% або нізкіх ставак да 50%. У пералік сельскагаспадарчай прадукцыі, на якую будзе накладацца мыта, сярод іншага трапілі мяса і мясныя субпрадукты, малочная прадукцыя, збожжа, садавіна, гародніна, алеі (аліўкавы, сланечнікавы, какосавы, кунжутны і інш.) і тлушчы, іншыя прадукты), кава, гарбата, какава, цукар, кандытарскія вырабы і інш.

Азотныя ўгнаеньні, акрамя цяперашняга мыта ў памеры 6,5%, будуць абкладацца дадатковым мытам, якое будзе паступова павялічвацца, пачынаючы з 40 ці 45 эўра за тону ў залежнасьці ад тыпу ўгнаеньня (што адпавядае прыкладна 13%), да забароннага ўзроўню ў 315 або 430 эўра за тону адпаведна — гэта прыкладна 100%, што павінна фактычна спыніць імпарт беларускіх і расейскіх угнаеньняў у ЭЗ. Чакаецца, што паступовы рост мыта на ўгнаеньні павінен завяршыцца за тры гады, да 2028 году.

Таксама плянуецца, што беларуская і расейская прадукцыя будзе выключаная з мытных квотаў Эўразьвязу. Гэта выключыць магчымасьць паставак зь ніжэйшымі тарыфамі.

Абмежаваньні ўводзяцца, згодна з прапановай Эўракамісіі, таму, што ў 2023 годзе залежнасьць ад расейскіх угнаеньняў у ЭЗ перавышала 25%, а гэта «стварае пагрозу для стабільнасьці рынку ЭЗ».

«Беларускі экспарт сельскагаспадарчай прадукцыі й угнаеньняў хоць і менш значны (агульны аб’ём €92 млн і €29,6 млн адпаведна), але ўключаны ў санкцыйны мэханізм, каб перадухіліць нелегальны транзыт расейскай прадукцыі празь Беларусь», — гаворыцца ў дакумэнце.

Новыя абмежаваньні — частка шырэйшай палітыкі эканамічнага ціску на Расею і Беларусь за падтрымку вайны супраць Украіны.

Чакаецца, што ў выніку ўвядзеньня новага мыта імпарт беларускіх і расейскіх тавараў, ахопленых рэглямэнтам, практычна спыніцца.

Эўразьвяз плянуе замясьціць пастаўкі за кошт уласнай вытворчасьці або альтэрнатыўных пастаўшчыкоў. Для ўгнаеньняў гэта можа быць, напрыклад, Альжыр і Эгіпет.

  • Чакаецца, што мыта ўвядуць праз чатыры тыдні пасьля публікацыі рэглямэнту.

Санкцыі супраць Беларусі за падтрымку расейскай вайны ва Ўкраіне

Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.

Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».

26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.

28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.

Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.

У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.

Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.

Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.

5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.

6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».

8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».

Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.

Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.

Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.

Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.

9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.

16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.

22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.

28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.

20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG