Па інфармацыі чытачоў парталу «Люстэрка», перабоі закранулі як мінімум сем сэрвісаў ананімізацыі. Аднак засталіся і дзейныя спосабы падключыць свабодны доступ да інтэрнэту.
Паводле выданьня, праблемы пачаліся каля 10-11 раніцы па менскім часе. Яны закранулі жыхароў Менску і ўсіх абласьцей Беларусі. Цяжкасьці ёсьць пры выкарыстаньні і хатняга, і мабільнага інтэрнэту.
Беларусы не змаглі падключыцца да гэтых VPN-сэрвісаў: Proton VPN, NordVPN, TunnelBear, Thunder VPN, VPN — Super Unlimited Proxy, X-VPN, Planet VPN. А вось Psiphon, паводле інфармацыі чытачоў «Люстэрка», працуе.
Адзін з карыстальнікаў падрабязна апісаў, як выглядаў збой з Mullvad VPN: «Пасьля пасьпяховага ўсталяваньня злучэньня з сэрвэрамі Mullvad любыя пакеты перастаюць праходзіць. На ўсіх правайдэрах, уключаючы мабільны інтэрнэт, сытуацыя ідэнтычная», — паведаміў ён. Па яго назіраньнях, праблема распаўсюдзілася на два пратаколы — WireGuard і OpenVPN, а праз пратакол AmneziaWG атрымалася падлучыцца.
«Падобна на выбарачнае блякаваньне сэрвэраў, а не агульнае фільтраваньне VPN-трафіку. Але ўлічваючы бягучыя падзеі, я не выключаю, што з часам блякаваньне можа пашырыцца і на іншыя папулярныя VPN-сэрвісы», — разважае суразмоўца выданьня.
«Відаць, выкарыстоўваюць камбінаваны падыход з блякаваньня вядомых IP-адрасоў публічных VPN-сэрвісаў у зьвязку з блякаваньнем партоў, акрамя нейкага „белага сьпісу“», — падзяліўся іншы чытач «Люстэрка», які паспрабаваў розныя спосабы абысьці блякаваньне.
Яшчэ карыстальнікі паведамілі аб збоі ў падлучэньні да асобных замежных сайтаў — Twitch, Steam, Reddit, а таксама пірацкіх онлайн-кінатэатраў. Ёсьць таксама два сьведчаньні пагаршэньня працы Telegram, аднак у цэлым мэсэнджар застаецца даступны.
Ёсьць сьведчаньні, што Вікіпэдыя пераставала працаваць зь Беларусі прыкладна на паўтары гадзіны. Збой зафіксаваў сайт Downdetector. su, там сабралася больш за 40 скаргаў, большасьць — зь Беларусі.
Час абмежаваньня супадае з правядзеньнем 26 студзеня электаральнай працэдуры, якую рэжым Аляксандра Лукашэнкі называе «прэзыдэнцкімі выбарамі».
Выбары 2025 году ў Беларусі
- Выбары прэзыдэнта Беларусі прызначылі на 26 студзеня 2025 году — нашмат раней, чым можна было чакаць. Такое рашэньне ўхвалілі на пасяджэньні Палаты прадстаўнікоў 23 кастрычніка. Паводле заканадаўства, сёмыя прэзыдэнцкія выбары ў Беларусі павінны адбыцца не пазьней за 20 ліпеня 2025 году.
- Аляксандар Лукашэнка ўжо заявіў пра намер працягнуць сваю ўладу над краінай яшчэ прынамсі на пяць год. Гэта будуць ужо сёмыя выбары для аўтарытарнага кіраўніка дзяржавы. Колькі часу Лукашэнка застаецца ва ўладзе: онлайн-лічыльнік.
- Напярэдадні абвяшчэньня даты галасаваньня амбасадар Расеі ў Беларусі Барыс Грызлоў сказаў, што расейскі бок дапаможа Менску ў выпадку «спробаў дэстабілізацыі» ў часе выбараў, калі Беларусь зьвернецца па такую дапамогу.
- Офіс Сьвятланы Ціханоўскай, Аб’яднаны пераходны кабінэт і Каардынацыйная рада выпусьцілі сумесную заяву, у якой падкрэсьлілі, што цяперашняя электаральная кампанія праводзіцца ў сытуацыі глыбокага палітычнага крызісу ў Беларусі, а Аляксандар Лукашэнка незаконна ўтрымлівае ўладу шляхам рэпрэсіяў супраць беларускага грамадзтва, і заклікалі беларусаў «выказаць свой пратэст шляхам галасаваньня супраць усіх, хто крадзе нашае права голасу».
- Раней дэмакратычныя сілы Беларусі ўжо неаднаразова заяўлялі, што будуць дабівацца непрызнаньня гэтых выбараў міжнароднай супольнасьцю.
- Папярэднія выбары 9 жніўня 2020 году прайшлі ва ўмовах масавых фальсыфікацыяў і адзначыліся самымі масавымі пратэстамі за ўсю гісторыю незалежнай Беларусі. Вынікі выбараў не былі прызнаныя міжнароднай супольнасьцю, краіны Захаду неаднойчы ўводзілі санкцыі супраць рэжыму Лукашэнкі, якога ня лічаць легітымным прэзыдэнтам Беларусі.
- Палітычны крызіс, які ўзьнік пасьля выбараў 2020 году ў Беларусі, і шырокамаштабныя рэпрэсіі ў краіне працягваюцца да гэтага часу.
- У турмах Беларусі застаецца каля 1,3 тысячы чалавек, якіх праваабаронцы прызналі палітвязьнямі (колькасьць асуджаных з палітычных матываў значна большая). З 2020 году праваабарончаму цэнтру «Вясна» вядомыя прозьвішчы сама меней 7400 фігурантаў крымінальных палітычных спраў у Беларусі, заведзеных з палітычных матываў. Зь іх 6013 чалавек ужо асудзілі (як мінімум 2336 чалавек — на пазбаўленьне волі, 681 — на «хімію»). Больш за 50 тысяч чалавек затрымлівалі з палітычных матываў.
- У сувязі з пагрозай палітычнага перасьледу Беларусь пасьля 2020 году, паводле розных ацэнак, пакінулі сотні тысяч беларусаў: сацыёляг Генадзь Коршунаў у траўні 2024-га ацэньваў маштаб палітычнай эміграцыі ў 500-600 тысяч чалавек, намесьнік кіраўніка МУС Карпянкоў у кастрычніку 2023 году казаў, што з 2020 году зь Беларусі зьехалі 350 тысяч чалавек.
- У Беларусі ліквідавалі амаль амаль усе палітычныя партыі, засталіся толькі 4 праўладныя партыі. Агулам грамадзкі сэктар краіны, пачынаючы з пасьлявыбарчага пэрыяду 2020 году, страціў ужо сама меней 1838 некамэрцыйных арганізацыяў (сярод іх грамадзкія аб’яднаньні, прафсаюзы, палітычныя партыі, фонды, недзяржаўныя ўстановы, асацыяцыі, рэлігійныя арганізацыі і інш.).
- Пасьля выбараў 2020 году ў Беларусі прызналі «экстрэмісцкімі фармаваньнямі/арганізацыямі» і заблякавалі практычна ўсе незалежныя СМІ, журналісты гэтых мэдыя сутыкнуліся з затрыманьнямі, арыштамі, ператрусамі, адміністрацыйным і крымінальным перасьледам, многія вымушана пакінулі краіну і працягнулі працаваць з-за мяжы. За кратамі ў Беларусі цяпер застаюцца 36 прадстаўнікоў мэдыя.
- 97% членаў выбаркамаў працавала на папярэдніх выбарах, вынікае з дакладу ініцыятывы былых сілавікоў BelPol.
Форум