Прэзыдэнт ЗША Дональд Трамп падпісаў указ аб часовым прыпыненьні замежнай дапамогі ЗША іншым краінам на 90 дзён для ацэнкі эфэктыўнасьці і адпаведнасьці адпаведных праграм замежнай палітыцы ЗША.
Дакумэнт апублікаваў Белы дом.
«Усе кіраўнікі дэпартамэнтаў і агенцтваў, якія адказваюць за праграмы замежнай дапамогі ЗША, павінны неадкладна прыпыніць новыя абавязаньні і выплаты», — гаворыцца ў рашэньні, падпісаным Трампам 20 студзеня.
Згодна з дакумэнтам, на працягу 90 дзён на падставе ацэнак будзе прымацца рашэньне аб падаўжэньні, зьмяненьні або спыненьні кожнай праграмы замежнай дапамогі.
Reuters і Associated Press адзначаюць, што пакуль невядома, якія праграмы, краіны, няўрадавыя і міжнародныя арганізацыі закране ўказ, улічваючы, што фінансаваньне многіх праграм ужо зацьверджана Кангрэсам і павінна быць выдаткавана, калі ўжо не патрачана.
«Ніякая далейшая замежная дапамога Злучаных Штатаў ня будзе аказвацца такім чынам, каб гэта не адпавядала ў поўнай меры замежнай палітыцы прэзыдэнта Злучаных Штатаў», – падкрэсьліў Трамп 20 студзеня.
Трамп доўгі час выступаў супраць замежнай дапамогі ад ЗША, нягледзячы на тое, што такая дапамога звычайна складае каля 1 адсотка фэдэральнага бюджэту, за выключэньнем надзвычайных абставінаў, такіх як мільярды даляраў на зброю, перададзеную Ўкраіне, якая адбівае расейскую агрэсію. Трамп раней крытыкаваў аб’ёмы фінансаваньня, выдзеленага ЗША на дапамогу Ўкраіне на фоне маштабнага расейскага ўварваньня.
Форум