Пра ператрус у рэдакцыі «Белсату» паведаміла Gazeta Wyborcza.
Супрацоўнікі Цэнтральнага антыкарупцыйнага бюро прыйшлі раніцай 20 лістапада ў будынак TVP на плошчы Паўстанцаў у Варшаве ў рамках расьсьледаваньня справы аб злоўжываньнях на тэлеканале «Белсат», піша выданьне. Свабодзе ўдалося пацьвердзіць інфарамцыю аб ператрусе ў рэдакцыі «Белсату».
Ператрус у рэдакцыі тэлеканалу «Белсат», пэўна, зьвязаны з заявай аб злачынстве, якую падало цяперашняе кіраўніцтва TVP.
Гаворка пра заяву аб злоўжываньнях на вялікія сумы, зьвязаныя з аплатай ІТ-паслуг для тэлеканалу, піша Gazeta Wyborcza.
Як стала вядома «Wyborczej», супрацоўнікі Цэнтральнага антыкарупцыйнага бюро прыйшлі таксама ў кватэру былой кіраўніцы «Белсату» Агнешкі Рамашэўскай. Але сама яна гэта зьняпраўдзіла ў сацсетках.
Цяперашняе кіраўніцтва TVP абвінавачвае Рымашэўскую ў тым, што тая не рэагавала на сыгналы аб злоўжываньнях і забрала з рэдакцыі дыскі з матэрыяламі, якія належаць тэлевізіі.
Пацьверджаньня інфармацыі пра ператрус у Рамашэўскай газэта ня мае. Сама яна і яе былы намесьнік Аляксей Дзікавіцкі рашуча адмаўлялі ўсе абвінавачваньні.
На сваім профілі ў сетцы Х Рымашэўская напісала пра «сыстэматычнае нішчэньне „Белсату“».
Выканаўца абавязкаў дырэктара тэлеканалу «Белсат» Аляксей Дзікавіцкі меўся заставацца на пасадзе да 3 сьнежня, але падаў заяву аб звальненьні ўжо ад 22 лістапада. Дзікавіцкі растлумачыў, што яму загадалі зьліквідаваць структурную адзінку «Белсат TV», а ён ня хоча гэтага рабіць нават фармальна.
15 лістапада рэдакцыя «Белсату» разам з выканаўцам абавязкаў дырэктара даведалася аб прызначэньні новай кіраўніцы — Аліны Коўшык.
Журналістам таксама абвясьцілі, што «Белсат» перастане быць самастойнай адзінкай, а стане часткай новага цэнтру замежнага вяшчаньня TVP, куды таксама залучаць ангельскамоўны канал TVP World.
У чым вінавацяць кіраўніцтва «Белсату»
Паводле ліквідатара TVP Даніэля Горгаша, кантракты, заключаныя з вонкавай кампаніяй, якая кіруе сэрвэрамі, былі нявыгаднымі для грамадзкага вяшчальніка і прывялі да вялікіх стратаў. Разгляд азначае, што пракуратура прыняла заяву і распачала праверку.
«Паводле ліквідатара TVP Даніэля Горгоша, кантракты, падпісаныя са зьнешняй кампаніяй, якая кіруе сэрвэрамі, былі надзвычай нявыгаднымі для грамадзкага вяшчальніка і прывялі да велізарных стратаў», — пісала раней выданьне wPolityce.pl.
- Тэлеканал «Белсат» зазнаў глябальныя зьмены пасьля парлямэнцкіх выбараў у Польшчы. У сакавіку 2024 году з пасады дырэктаркі звольнілі стваральніцу каналу Агнешку Рамашэўскую-Гузы, якая ўзначальвала канал ад моманту стварэньня да сакавіка 2024 году, агулам больш за 18 гадоў. З таго часу абавязкі дырэктара «Белсату» выконваў Аляксей Дзікавіцкі.
- Паводле польскага журналіста-расьсьледніка Яцэка Харлуковіча на партале Onet, кіраўніцтва каналу падазраюць у заключэньні бяз тэндэру 248 кантрактаў. Як сьцьвярджаў партал, многія з гэтых кантрактаў не былі выкананыя.
- У датычнасьці да фінансавых парушэньняў на тэлеканале «Белсат» падазраюцца 10 мэнэджараў мэдыя, у тым ліку былая дырэктарка Агнешка Рамашэўска-Гузы і яе экс-намесьнік, цяперашні кіраўнік тэлеканалу Аляксей Дзікавіцкі.
- Агнешка Рамашэўска-Гузы, Вальдэмар Даманьскі, Вольга Швед, Аляксей Дзікавіцкі і Міраслаў Цівуновіч паставілі свае подпісы пад зваротам наконт сытуацыі з абвінавачаньнямі ў бок каналу «Белсат».
- «Рашуча адкідаем абвінавачаньні ў наш адрас з боку тэлевізійнай групы TVP. Пратэстуем супраць зьнеслаўленьня як нас, так і „Белсату“ — незвычайна важнай як для беларусаў, так і для польскага грамадзтва інстытуцыі, будаваньню якой мы прысьвяцілі шмат гадоў жыцьця».
У звароце аўтары апісалі этапы разбудовы «Белсату» ня толькі як «традыцыйнай» тэлевізіі, але як мультымэдыйнай плятформы.
Форум