Паўлу Чуркіну 37 гадоў, у 2021-м яго асудзілі за «абразу» Лукашэнкі (арт. 368 Крымінальнага кодэксу) на адзін год калёніі. Тое пакараньне Павал Чуркін адбыў цалкам і выйшаў на волю ў траўні 2022 году.
На пачатку красавіка 2024-га стала вядома, што Паўла затрымалі зноў. Цяпер яго падазраюць у супрацоўніцтве з Галоўнай управай выведкі Міністэрства абароны Ўкраіны. Паводле беларускіх сілавікоў, Чуркін з мэтай выведкі нібыта здымаў на відэа размяшчэньне ракетных установак «Іскандэр».
Цяпер палітвязьня абвінавачваюць у «здрадзе дзяржаве» (ч. 1 арт. 356 КК), а таксама ў «падрыхтоўцы да ўдзелу на тэрыторыі замежнай дзяржавы ва ўзброеным фармаваньні або ўзброеным канфлікце» (ч. 1 арт. 361-3 КК). Максымальнае пакараньне за гэта — 15 гадоў зьняволеньня.
Працэс над Паўлам Чуркіным вядзе судзьдзя Павал Клімаў.
Паводле «Вясны», па стане на 6 лістапада 2024 году за «здраду дзяржаве» у Беларусі асудзілі мінімум 88 чалавек, зь іх 13 жанчын. Праваабаронцы адзначаюць, што лічба асуджаных паводле 356-га артыкулу КК імкліва расьце, на пачатку году яна была амаль удвая меншая.
Форум