Згодна з праектам бюджэту на наступны год, улады плянуюць сабраць падаткаў на 34 мільярды 479 мільёнаў рублёў. Гэта на 17% больш, чым было сёлета.
Плянуецца рост падаткаў на прыбытак, на даданую вартасьць і рост акцызаў. Улады спадзяюцца таксама на рост замежнага гандлю. Пляны ў падатках па гэтым кірунку — звыш 8 мільярдаў рублёў, ці на 11,8% больш, чым сёлета.
Таксама ў плянах сабраць штрафаў на 243,7 мільёна рублёў, што на 14,6% больш, чым у 2024 годзе.
Новыя падаткі і павышэньне ўжо існых
На фоне чаканьняў павышэньня падатковых паступленьняў у бюджэт уводзяцца новыя падаткі, а таксама растуць стаўкі па старых.
З 2025 году некаторым беларусам давядзецца плаціць так званы «падатак на багацьце». Яго ўвялі сёлета, але аплата будзе з наступнага году па выніках гэтага. Калі даход чалавека перавышае 200 000 рублёў за год (больш за 16 667 рублёў за месяц), то стаўка па падатку будзе 25% замест цяперашніх 13% з сумы перавышэньня.
Пакуль гаворка вядзецца пра тры віды даходаў:
- Даходы з дывідэндаў
- Даходы паводле працоўных дамоваў (заробак)
- Даходы паводле грамадзянска-прававых дамовах (дамовы падраду)
Цяпер чыноўнікі думаюць над тым, каб павялічыць парогавую суму, пасьля перавышэньня якой налічваецца гэты падатак. Яе хочуць павялічыць з 200 тысяч да 220 тысяч рублёў. Аднак зьмены пакуль не прынятыя.
Таксама налета ўлады Беларусі плянуюць падняць падатак на першую кватэру. Гэта прадугледжана праектам зьменаў у Падатковы кодэкс. За 2024 год падатак на двухпакаёўку ў Менску быў 48 рублёў. Калі зьмены прымуць, ён вырасьце прыкладна да 51 рубля.
З 1 сакавіка наступнага году самазанятыя, рамесьнікі і ўладальнікі аграсядзібаў пачнуць плаціць унёскі ў фонд сацыяльнай абароны насельніцтва. Гэта 29% ад самастойна вызначанага даходу, але штомесячны прыбытак пры гэтым мусіць быць ня меншым, чым мінімальны заробак (626 рублёў). Раней гэтыя катэгорыі маглі добраахвотна рабіць унёскі ў фонд, з наступнага ж году гэта стане абавязкам. Такім чынам, зь мінімальнага заробку штомесячны плацеж складзе 181 рубель 64 капейкі.
«Павялічваюцца расходы, таму мусяць павышаць даходы»
Старшая навуковая супрацоўніца Beroc Анастасія Лузгіна адзначае, што растуць расходы бюджэту, у тым ліку выдаткі на войска і сілавікоў.
«Расходы бюджэту будуць большыя на 4 мільярды рублёў. У наступным годзе вырастуць расходы на абарону, трэба дадаткова ўліваць грошы ў фонд сацыяльнай абароны насельніцтва», — прыводзіць прыклад эканамістка.
Расходы на абарону налета плянуюць падняць на 32%, у параўнаньні зь сёлетнім бюджэтам — да 4,7 мільярда рублёў. Расходы на работу судоў і сілавых органаў падымуць на 14%, да 5,3 мільярда рублёў.
Паводле Анастасіі Лузгіной, павышэньне падатковай нагрузкі заўважыць буйны бізнэс, самазанятыя, рамесьнікі, уладальнікі аграсядзібаў.
«Дадатковыя выплаты для самазанятых — 29% ад даходу — гэта істотная выплата. Павышэньне падатку на кватэру, магчыма, заўважаць ня ўсе. А калі чалавек працуе ў нейкай кампаніі паводле найму, для яго, магчыма, павышэньне падаткаў будзе ня моцна адчувальным. Павялічэньне падаткаў адчуюць людзі, якія пачынаюць свой бізнэс», — кажа суразмоўца.
Анастасія Лузгіна таксама зазначае, што колькасьць ІП у апошнія гады зьніжаецца, а падатковыя выплаты для іх растуць. Гэта значыць, што падатковая нагрузка на аднаго такога прадпрымальніка ўвесь час павялічваецца.
Форум