Цягам зьезду IFEX і на двухбаковых сустрэчах з партнэрамі прадстаўнікі БАЖ абмяркуюць міжнародныя дзеяньні для падтрымкі зьняволеных журналістаў і спыненьня катаваньня іх у турмах, паведамляе БАЖ.
Таксама ў фокусе ўвагі візыту ў Бэрлін – праграмы для журналістаў і мэдыяў, міжнародныя кампаніі і падтрыманьне ўвагі да Беларусі.
13 красавіка, у дзень народзінаў палітзьняволенай журналісткі Ларысы Шчыраковай, прадстаўнікі БАЖ, IFEX і Міжнароднай фэдэрацыі журналістаў выказалі зь ёй салідарнасьць.
Гомельская журналістка-фрылянсэрка Ларыса Шчыракова адбывае прысуд паводле двух крымінальных артыкулаў. Сёньня ёй спаўняецца 51 год.
- Ларысу Шчыракову засудзілі на тры з паловай года зьняволеньня ў калёніі за «садзейнічаньне экстрэмісцкай дзейнасьці» і «дыскрэдытацыю Рэспублікі Беларусь».
- Паводле матэрыялаў справы, Ларыса Шчыракова нібыта зьмясьціла ў інтэрнэце зьвесткі, якія дыскрэдытавалі Рэспубліку Беларусь. Яе вінавацяць таксама ў «зборы, стварэньні, апрацоўцы, захоўваньні і перадачы інфармацыі для «Вясны« і «Белсату».
- Камітэт правоў чалавека ААН прызнаў Беларусь вінаватай у парушэньні правоў Ларысы Шчыраковай на законнае права зьбіраць і распаўсюджваць інфармацыю, замацаванае артыкулам 19 Міжнароднага пакту аб грамадзянскіх і палітычных правах.
- Напрыканцы верасьня 2023 года журналістку этапавалі з гомельскага СІЗА ў жаночую папраўчую калёнію № 4, дзе яна працуе швачкай.
