Пра гэта паведамілі родныя і прадстаўнікі грамадзянскай кампаніі за яе вызваленьне, паведамляе AFP.
Паведамляецца, што Махамадзі пратэстуе супраць умоваў утрыманьня ў турме Эвін, а таксама супраць патрабаваньня іранскіх уладаў, каб жанчыны насілі хіджаб. Якія менавіта патрабаваньні яна выставіла, не паведамляецца.
Раней улады Ірану адмовіліся перавесьці праваабаронцу з турмы ў шпіталь. Па словах яе мужа Тага Рахмані, турэмныя чыноўнікі праігнаравалі меркаваньне турэмнага лекара, які агледзеў Махамадзі, выявіў «крытычны ціск у лёгкіх і дрэнны стан артэрый» і даў рэкамэндацыю перавесьці яе ў цывільную бальніцу для лячэньня.
Іранскія ўлады пакуль афіцыйна не пацьвердзілі, што Махамадзі пачала галадоўку.
Наргес Махамадзі атрымала Нобэлеўскую прэміі міру 2023 году за «барацьбу супраць прыгнёту жанчын у Іране і заахвочваньне правоў чалавека і свабоды для ўсіх».
На працягу многіх гадоў яна выказвала свой пратэст супраць правілаў абавязковага нашэньня хіджабу, уведзеных для іранскіх жанчын, а таксама супраць абмежаваньняў правоў і свабодаў жанчын у Іране.
Іранскія ўлады арыштоўвалі яе 13 разоў, судзілі пяць разоў і прысудзілі ў агульнай складанасьці да 154 удараў бізуном і 31 года пазбаўленьня волі.
Рашэньне аб прысуджэньні ёй Нобэлеўскай прэміі зьвязана, у прыватнасьці, з масавай кампаніяй пад лёзунгам «Жанчына. Жыцьцё. Свабода», якая пачалася ў Іране пасьля леташняй сьмерці актывісткі Махсы Аміні. Удзельнікі кампаніі выступаюць за правы жанчын і, у прыватнасьці, супраць абавязковага нашэньня хіджаба. Масавыя акцыі жорстка падаўляліся ўладамі.
