Уладзімір Зяленскі наведаў Кангрэс ЗША, дзе сустрэўся як з заканадаўцамі, якія падтрымліваюць палітыку адміністрацыі Байдэна, так і з больш скептычна настроенымі рэспубліканцамі.
Прэзыдэнт Украіны сустрэўся з кіраўніцтвам Палаты прадстаўнікоў, якую кантралююць рэспубліканцы, а таксама выступіў на закрытым пасяджэньні Сэнату.
Адміністрацыя Джо Байдэна дамагаецца ад Кангрэсу выдзяленьня на патрэбы дапамогі Ўкраіне дадатковых 24 мільярдаў даляраў. Шэраг рэспубліканцаў у Палаце прадстаўнікоў і Сэнаце ставяць неабходнасьць гэтага пад сумненьне. Сьпікер Палаты Кевін Макарці сказаў, што ня можа паабяцаць Зяленскаму, што запыт будзе задаволены.
«Ці ёсьць справаздача па ўжо выдзеленых сродках? Ці ёсьць плян перамогі? Я думаю, гэта хочуць даведацца амэрыканцы», — заявіў ён. Пасьля сустрэчы з прэзыдэнтам Украіны Макарці назваў перамовы зь ім «добрымі» і «плённымі».
Лідэр дэмакратычнай большасьці ў Сэнаце Чак Шумэр адзначыў, што Зяленскі сказаў яму, што калі Ўкраіна не атрымае дапамогі, яна можа прайграць вайну. Кіраўнік камітэту Палаты прадстаўнікоў у замежнай палітыцы рэспубліканец Майкл Маккол заявіў, што прэзыдэнт Украіны на сустрэчы, наадварот, выказаў упэўненасьць у перамозе, часткай шляху да якой павінна стаць выдзяленьне новай дапамогі з боку ЗША.
Па словах Маккола, украінскі лідэр у першую чаргу прасіў аб пастаўках зьнішчальнікаў F-16 і дальнабойных ракет ATACMS.
Пасьля наведваньня Капітолія Зяленскі адправіўся ў Пэнтагон, дзе правёў перамовы зь міністрам абароны ЗША Лойдам Остынам.
Пасьля гэтага Зяленскі сустрэўся ў Белым доме з прэзыдэнтам ЗША Джо Байдэнам. Джо Байдэн з жонкай Джыл сустрэлі Ўладзіміра Зяленскага з жонкай Аленай ля ўваходу ў Белы дом.
Прэзыдэнт Украіны падзякаваў Байдэну за дапамогу ў барацьбе з, як ён выказаўся, «расейскім тэрорам». Прэзыдэнт ЗША сказаў, што будзе дамагацца таго, каб сьвет па-ранейшаму падтрымліваў Украіну.
Байдэн плянуе аб’явіць у чацьвер аб перадачы пакету вайсковай дапамогі Ўкраіне на суму 325 мільёнаў даляраў, піша «Голас Амэрыкі». Аб пастаўках ракет ATACMS, падобна, абвешчана ня будзе, бо адміністрацыя ЗША яшчэ не прыняла рашэньня.
У Кангрэсе ЗША цяпер ідуць спрэчкі паміж дэмакратамі і рэспубліканцамі аб бюджэтных законапраектах на 2024 год. У выпадку, калі яны ня будуць прыняты да 1 кастрычніка, фэдэральны ўрад ня зможа фінансаваць бягучыя выдаткі, узьнікне сытуацыя так званага шатдаўна. Аб’ёмы дапамогі Ўкраіне на новы фінансавы год — адзін з прадметаў спрэчкі паміж заканадаўцамі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
