Сёлета паказчыкі захворваньня на клешчавы энцэфаліт засталіся на ўзроўні аналягічнага пэрыяду мінулага году, а вось захворваньне на хваробу Лайма рэзка вырасла. Ажно ў 1,4 раза, паінфармавалі ў Рэспубліканскім цэнтры гігіены, эпідэміялёгіі і грамадзкага здароўя.
Выпадкі захворваньня на клешчавы энцэфаліт зарэгістраваны ў 31 раёне краіны ў выглядзе адзінкавых выпадкаў. Таксама зарэгістраваны 2 ачагі ў Смаргонскім і Валожынскім раёнах па 2 выпадкі ў кожным. Інфэкцыя разьвівалася пасьля ўжываньня казінага малака.
У некалькіх раёнах Берасьцейскай (4) і Горадзенскай (3) абласьцей, дзе знаходзіцца Белавеская пушча, колькасьць выпадкаў клешчавога энцэфаліту традыцыйна вышэйшая за сярэдні ўзровень захворваньня ў краіне.
Цягам 7 месяцаў 2023 году хвароба Лайма адзначалася сярод жыхароў 79 рэгіёнаў Беларусі.
