Пра гэта піша Delfi.
Згодна з прапановай ведамства, другой замежнай мовай у латвійскіх навучальных установах можна будзе выбраць толькі адну з моваў ЭЗ або замежную мову, вывучэньне якой запісана ў міжурадавых дамовах у сфэры адукацыі.
Міністэрства адукацыі лічыць, што гэта будзе спрыяць уключэньню моладзі ў адукацыйную прастору Эўропы і вывучэньню афіцыйных моваў ЭЗ.
Міністарка адукацыі і навукі Аніта Муйжніецэ сказала, што пры абмеркаваньні гэтага пытаньня з прэзыдэнтам Эгілам Левітсам акцэнтавалася неабходнасьць забясьпечыць вывучэньне якой-небудзь з афіцыйных моваў ЭЗ ува ўсіх школах.
«Гэта момант, калі нам як ніколі неабходна ўмацоўваць асноўную каштоўнасьць Латвіі — нацыянальную мову — і моцную Латвію ў агульнай сям’і Эўрапейскага Зьвязу», — адзначыла яна.
У Латвіі першую замежную мову пачынаюць вучыць у першай клясе, часьцей за ўсё гэта ангельская мова. Другую замежную мову ў навучальных установах, дзе выкладаньне на латыскай, пачынаюць вывучаць у чацьвёртай клясе. Яе выбар пакуль заканадаўча не рэгулюецца, школа сама можа прапанаваць другую замежную мову. За тры гады латвійскія ўлады маюць намер забясьпечыць школы настаўнікамі для выкладаньня другой замежнай мовы.
У Латвіі ў жніўні сёлета казалі пра абмежаваньні выкарыстаньня расейскай мовы ў грамадзкіх месцах і на працоўным месцы. У Міністэрстве юстыцыі прапаноўвалі спаслацца на апытаньне грамадзкай думкі 2012 году, дзе дзьве траціны латышоў выказаліся супраць выкарыстаньня расейскай як другой дзяржаўнай.
