Сьведка расказаў, як катавалі экс-сьледчага
Мікіта Старажэнка з 2017 году працаваў у Сьледчым камітэце: сьледчым у Партызанскім райаддзеле менскага СК. Ён звольніўся пасьля выбараў на знак пратэсту, і ўжо трэці месяц яго трымаюць у СІЗА паводле абвінавачаньня ў «распальваньні сацыяльнай варожасьці» нібыта за тое, што «зьліў» зьвесткі супрацоўнікаў ГУБАЗіКа ў «пратэставы тэлеграм-канал».
«Вясна» паведаміла, што нядаўна сукамэрнік Старажэнкі, які ўтрымліваўся зь ім у карцары ІЧУ Акрэсьціна, расказаў, што экс-сьледчага даставілі туды моцна зьбітага. Таксама, паводле былога зьняволенага, Старажэнка быў прызначаны ў 2020 годзе весьці справу супраць 16-гадовага зьбітага сілавікамі хлопца (верагодна, гаворка ідзе пра Цімура Міцкевіча) — менавіта тады Мікіта звольніўся са сьледчых органаў.
«Ён быў увесь сіні: ад канца хрыбетніка і амаль да пятак. У яго былі нават ня сінія, а цёмна-фіялетавыя ногі... Білі нагамі, дубінкамі, намотвалі анучу на галаву, надзявалі вядро для сьмецьця на галаву і білі па вядры, каб сьлядоў зьбіцьця не заставалася», — паведаміў сукамэрнік Старажэнкі.
На гітарыста Pomidor/off завялі крымінальную справу
Гітарыста Pomidor/off Уладзіслава Плюшчава затрымалі 12 красавіка і асудзілі на 25 сутак адміністратыўнага арышту. Як паведаміў тэлеграм-канал BY-Culture, сёньня стала вядома, што Плюшчава абвінавачваюць паводле арт.188 КК (паклёп).
