У Міжнародным аэрапорце Кабулу імя Хаміда Карзая адбылася страляніна паміж афганскімі сіламі бясьпекі і невядомымі нападнікамі. Пра гэта 23 жніўня, паведаміла ў Twitter аб’яднанае апэратыўнае камандаваньне сіл бундэсвэра.
Паводле справаздачы бундэсвэра, невядомыя нападнікі пачалі абстрэльваць афганцаў, а таксама амэрыканскіх і нямецкіх салдат. У выніку адзін з прадстаўнікоў афганскіх сіл бясьпекі быў забіты, яшчэ трое параненыя. Ніхто з вайскоўцаў ЗША і Нямеччыны не пацярпеў.
Афіцыйны прадстаўнік NATO раней паведаміў, што за апошнія сем дзён у аэрапорце Кабулу і яго ваколіцах загінулі сама меней 20 чалавек. Паводле відавочцаў, адных застрэлілі, іншыя загінулі ў цісканіне, перадало агенцтва AFP.
- Радыкальны рух «Талібан» узяў пад кантроль Кабул 15 жніўня і кантралюе большую частку Афганістану. Іншаземцы і афганцы, якія супрацоўнічалі з замежнымі прадстаўніцтвамі, спрабуюць выехаць з краіны. Сам аэрапорт знаходзіцца пад аховай амэрыканскіх вайскоўцаў і іх саюзьнікаў.
- Тымчасам талібы абвясьцілі амністыю ў дачыненьні да ўрадавых чыноўнікаў. Прадстаўнік талібаў заявіў, што амністыя распаўсюджваецца на прэзыдэнта Гані і віцэ-прэзыдэнта Салеха, якія пакінулі краіну.
