Пра гэта заявіў Аляксандар Лукашэнка ў інтэрвію тэлеканалу Sky News Arabia. Урывак апублікаваў тэлеграм-канал «Пул Первого».
«Калі яны хочуць схаваць праўду, літоўцы, палякі, немцы або французы, можна папракаць Беларусь у тым, што мы датычныя да гэтай міграцыі. Калі яны хочуць па-сапраўднаму змагацца з гэтай нелегальнай міграцыяй і ўвесьці яе ў нармальнае рэчышча, то хай пачынаюць зь сябе. Мы групоўкі людзей злачыннага характару ў Літве бачым. А чаму яны гэтага ня бачаць? Як толькі яны ліквідуюць у Літве групоўкі гэтыя, якія прывозяць у Літву нелегальных мігрантаў, нелегальная міграцыя ў Літву будзе ніжэйшая, чым летась, адзінкі будуць, — заявіў Лукашэнка ў адказ на пытаньне пра тое, ці датычная Беларусь да росту нелегальнай міграцыі ў Эўропу», — заявіў Лукашэнка.
Паводле яго, Беларусь гатовая дапамагчы ў гэтай барацьбе, «але не задарма»:
«І яшчэ адзін аргумэнт: яны ўвялі супраць нас санкцыі, яны пайшлі на здушэньне майго народу. Я — прэзыдэнт гэтага народу, я павінен, ацэньваючы сытуацыю, рабіць пэўныя крокі, каб народ не задушылі, каб краіну ня зьнішчылі. Прадпрымаючы супраць беларускага народу пэўныя дзеі, яны хочуць, каб мы іх абаранялі ў гэтай сытуацыі? Слухайце, як найменей, гэта дзіўна».
Лукашэнка дадаў, што праца на мяжы каштуе вялізных грошай.
Паводле апошніх зьвестак, на беларускай мяжы літоўскія памежнікі ад пачатку году затрымалі 2096 нелегальных мігрантаў. Гэта ў 26 разоў больш, чым у 2020 годзе. Літва абвінавачвае афіцыйны Менск у датычнасьці да арганізацыі патоку мігрантаў зь Беларусі. Парлямэнт Літвы на мінулым тыдні прыняў рэзалюцыю, якою прызнаў узрослую міграцыю празь Беларусь «гібрыднай агрэсіяй».
