Гэтыя пытаньні абмяркоўваюць палітычныя аглядальнікі Свабоды Валер Карбалевіч і Юры Дракахруст.
Валер Карбалевіч сёньня паведаміў у сваім фэйсбуку, што ў пятніцу, калі адбылася атака на журналістаў, зьвязаных са Свабодай, ён пакінуў Беларусь.
Карбалевіч
- Улады загадзя падрыхтавалі гэты напад, гэты пагром.
- Спачатку зьявілася інфармацыя пра «тэракты», а потым заява Лукашэнкі, што за гэтымі актамі індывідуальнага тэрору стаяць заходнія НДА і мэдыя.
- Калі адносна большасьці грамадзкіх арганізацыяў справа абмежавалася ператрусамі і канфіскацыяй тэхнікі, то па дзювюх групах быў нанесены больш моцны ўдар.
- Я маю на ўвазе праваабаронцаў і журналістаў.
- Гэта была ў значнай ступені помста Захаду за санкцыі з боку палітычнага кіраўніцтва Беларусі.
- Удар быў нанесены па тых суб’ектах, лёс якіх зьяўляецца найбольш адчувальным для заходняй грамадзкай думкі.
- Гэта будзе дзіўная зьява ў ХХІ стагодзьдзі ў Эўропе — краіна без грамадзянскай супольнасьці.
- Гэта спроба зноў загнаць апанэнтаў рэжыму загнаць у гета тэлеграм-каналаў.
- У тэлеграм-каналы можна пісаць і з-за мяжы, але гэта даволі абмежаваная аўдыторыя.
- Беларускія ўлады рэпрэсіямі гэтага тыдня вельмі дапамаглі місіі Ціханоўскай у ЗША.
- Але я ня думаю, што яны гэтую хвалю рэпрэсіяў падгадалі пад яе візыт.
- Іхны прынцып — махаць рукамі ва ўсе бакі, адбівацца з усіх сілаў, не зважаючы на тое, што робіць праціўнік.
- Я чакаў, што за Радыё Свабода возьмуцца тады, калі будуць новыя амэрыканскія санкцыі. Пра іх гаварыла Вікторыя Нуланд, высокапастаўленая амэрыканская дыпляматка.
- Я думаў, што ўлады пачакаюць, пакуль будуць уведзеныя гэтыя санкцыі, паглядзяць, якімі яны будуць.
- Тое, што амністыя, якой некаторыя чакалі, не адбылася на 3 ліпеня, ставіць пад сумнеў плён і апошняй ініцыятывы Юрыя Васкрасенскага.
- Ён, дарэчы, пра амністыю гаворыць з канца мінулага году.
- Пакуль амністыя рэальна не адбудзецца, мне цяжка будзе паверыць, што ўлады «адкручваюць» назад.
- Да верасьня могуць зьявіцца чарговыя санкцыі — і ЭЗ, і ЗША.
- Улада раззлуецца і скасуе ўсе пляны амністыі, калі яны ў яе нават ёсьць.
- Праект Канстытуцыі, апублікаваны Васкрасенскім, мяне зьдзівіў.
- Большасьць экспэртаў меркавала, што Лукашэнка рыхтуе сабе пасаду кіраўніка, старшыні Ўсебеларускага народнага сходу зь вялізнымі паўнамоцтвамі.
- Але з абнародаванага праекту гэтай схемы не вынікае.
- Калі гэты праект сапраўды будзе вынесены на рэфэрэндум, то з гэтага будзе вынікаць, што Лукашэнка сапраўды зьбіраецца сыходзіць.
- Вельмі важна, што ў гэтым праекце няма пераходных палажэньняў, не пазначана, калі новая Канстытуцыя набывае моц.
- Калі з 2025 году — гэта мала што мяняе ў палітычнай сытуацыі.
- Калі адразу пасьля прыняцьця — тады гэта новыя прэзыдэнцкія выбары без Лукашэнкі, гэта транзыт улады.
- У апошнім выпадку прыняцьцё Канстытуцыі азначае палітычны рух, які можа прывесьці да станоўчых вынікаў.
- Калі апублікаваная рэдакцыя — канчатковая, я мяркую, што апанэнтам рэжыму варта пайсьці на рэфэрэндум і прагаласаваць за гэты праект.
- Такая Канстытуцыя запускае палітычны працэс, магчыма, новыя выбары, магчыма, пачатак пераходнага пэрыяду.
- Гэта пэўнае выйсьці з таго тупіку, у якіх знаходзіцца краіна.
Што было раней
- 14 ліпеня па ўсёй Беларусі прайшлі ператрусы, допыты і затрыманьні праваабаронцаў, журналістаў, грамадзкіх актывістаў, сябраў некамэрцыйных арганізацый. Сёньня некаторых зь іх вызвалілі .
- Палітвязьням, якія адбываюць пакараньне ў папраўчых установах адкрытага тыпу (так званая «хімія»), прапануюць да 31 жніўня напісаць прашэньне аб памілаваньні на імя Лукашэнкі. Лісты з такім заклікам прыходзяць ад імя ўстановы «Круглы стол дэмакратычных сілаў» і падпісаныя Юрыем Васкрасенскім.
- Юры Васкрасенскі апублікаваў праект Канстытуцыі, які, паводле яго, быў распрацаваны афіцыйнай Канстытуцыйнай камісіяй. Праект прадугледжвае пэўнае скарачэньне паўнамоцтваў прэзыдэнта і не зьмяшчае апісаньня пасадаў кіраўніка Рады бясьпекі і Ўсебеларускага народнага сходу.
