6 траўня каля пад’езда супрацоўнікі АБЭЗ затрымалі 34-гадовага Ўладзімера Палуяна. Прычынай сталі сьняжынкі на акне, паведаміў тэлеграм-канал «Вясна назірае».
Паводле пратаколу, Уладзімер Палуян «з мэтай публічнага выказваньня сваіх грамадзка-палітычных поглядаў, правёў пікетаваньне шляхам разьмяшчэньня на акне сьняжынак БЧБ-расфарбоўкі, чым наўмысна парушыў Закон аб масавых мерапрыемствах».
Але на судзе 7 траўня супрацоўнікі АБЭЗ і ўчастковыя РУУС сказалі, што на акне былі не чырвоныя, а аранжавыя сьняжынкі, але пра гэта ў пратаколе вырашылі ня згадваць.
Судзьдзя Марына Фёдарава ўсё ж вырашыла арыштаваць Уладізмера Палуяна на 10 сутак.
У той жа дзень за падобную ж «правіну» асудзілі 43-гадовую Тацьцяну Грудзько Сілавікі ўгледзелі на ейным бальконе тры сьняжынкі і тры ручнікі «па БЧБ-схеме». На судзе Тацьцяна Грудзько заявіла, што ручнікі былі бэжавага, барвовага і малочнага колераў зь фіялетавымі палоскамі. Але судзьдзя аштрафавала яе больш як на 2 тысячы рублёў.
