Маскоўская карэспандэнтка швайцарскай тэлерадыёкампаніі SRF Люцыя Чыркі (Luzia Tschirky), якая правяла некалькі гадзін у менскай міліцыі, у інтэрвію свайму СМІ паведаміла пра абставіны затрыманьня 31 студзеня і ўмовах трохгадзіннага знаходжаньня ў адным з РУУС Менску (паводле валянтэраў — у Кастрычніцкім).
Па словах журналісткі, яна і знаёмая з мужам ішлі ў кавярню:
«Мы стаялі ля святлафора і зьбіраліся перайсьці вуліцу, калі каля нас нечакана спыніўся мікрааўтобус. Трое мужчын у масках выскачылі адтуль і сказалі прайсьці зь імі. Я тут жа патлумачыла, што зьяўляюся грамадзянкай Швайцарыі, журналісткай і маю акрэдытацыю. Я хацела паказаць свой пашпарт. Але яны схапілі мяне і маіх знаёмых і зацягнулі ў мікрааўтобус. На мікрааўтобусе не было надпісу. У машыне мы сядзелі з узброенымі дубінкамі амапаўцамі і іншымі затрыманымі», — сказала Чыркі.
Далей падзеі разьвіваліся так:
«Нам не казалі, чаму нас узялі, ці затрыманыя мы і куды нас павінны адвезьці. Гаварылі толькі пра тое, што хочуць высьветліць нашы асобы, і гэта павінны зрабіць не яны, а іншыя. Я ўвесь час дэманстравала свой пашпарт, у тым ліку перад міні-камэрамі на ўніформе мужчын. Было вельмі страшна быць у няведаньні, што адбываецца. У нейкі момант мікрааўтобус спыніўся. Яны далі нам выйсьці і пасадзілі ў машыну з двума мужчынамі. Тыя сказалі, што яны зь міліцыі і цяпер і даставяць у пастарунак. Я хацела запрацівіцца гэтаму, але мне далі зразумець, што гэта пацягне нэгатыўныя наступствы. Нам ніяк не патлумачылі [прычыны затрыманьня]. Ва ўпраўленьні міліцыі было вельмі шмат іншых людзей, якіх прывезьлі зь іншых месцаў. Маладыя і старэйшыя. Я прасіла дазволу патэлефанаваць у амбасаду, але мне было адмоўлена. У нейкі момант прыйшла дама зь міграцыйнай службы і сказала, што са мной жа нічога ня здарылася. Пасьля гэтага мне дазволілі пайсьці, а маіх знаёмых яны пакінулі ў пастарунку».
Па словах Чыркі, яна ня ведае, з чым зьвязана яе затрыманьне:
«Лічу, гэта было чыстае беззаконьне. Пасьля жнівеньскіх прэзыдэнцкіх выбараў па нядзелях рэгулярна праходзяць антыўрадавыя дэманстрацыі. Як я сёньня пазьней даведалася, людзі зьбіраліся ў невялікія групы, каб пратэставаць, напрыклад у дварах. Магчыма, [сілавікі] зрабілі здагадку, што мы хацелі сустрэцца зь іншымі. Акрамя таго, сёньня ў Расеі праходзілі буйныя выхады людзей. Гэта магло трохі нэрваваць чыноўнікаў у Беларусі, бо абедзьве краіны вельмі блізкія культурай і мовай», — лічыць журналістка.
Яна таксама паведаміла, што пасьля месяцаў чаканьня ў лістападзе мінулага году атрымала акрэдытацыю беларускага МЗС, а ў сьнежні — візу. «Я хацела як мага хутчэй паехаць у Беларусь, але сёньня я была ў горадзе ў асабістых справах. Спадзяюся, маіх знаёмых хутка вызваляць», — сказала Чыркі.
Перад тым Дэпартамэнт замежных спраў Швайцарыі зьвярнуўся ў Міністэрства замежных спраў Беларусі ў сувязі з затрыманьнем журналісткі.
«Дэпартамэнт мае інфармацыю аб затрыманьні швайцарскай журналісткі ў Менску. Ён знаходзіцца ў кантакце зь беларускім Міністэрствам замежных спраў і займаецца сытуацыяй», — паведаміла ведамства ў твітэры.
Учора ў беларускай сталіцы і іншых гарадах прайшлі традыцыйныя для нядзелі лякальныя акцыі пратэсту супраць фальсыфікацыі вынікаў жнівеньскіх прэзыдэнцкіх выбараў і перасьледу іншадумцаў. У адрозьненьне ад папярэдніх выходных, сілавікі сканцэнтраваліся ня толькі ў мікрараёнах, але і ў цэнтры, дзе затрымліваюць грамадзян.
