31 студзеня ў дзясятках гарадоў Расеі прайшлі несанкцыянаваныя вулічныя акцыі пратэсту ў падтрымку зьняволенага палітыка Аляксея Навальнага.
Па апошніх дадзеных, па краіне затрымалі звыш 5 тысяч чалавек. Праваабарончы праект «ОВД-Инфо» адзначае, што гэта рэкордная колькасьць затрыманых за адзін дзень у найноўшай гісторыі Расеі. Больш за ўсё затрыманых, звыш паўтары тысячы, — у Маскве.
Штаб Аляксея Навальнага анансаваў новую акцыю пратэсту на 2 лютага — у гэты дзень суд у Маскве можа адправіць апазыцыйнага палітыка ў калёнію.
Па выніках акцый заведзена некалькі крымінальных спраў.
Так, у Пецярбургу заведзеная справа аб гвалце над прадстаўніком улады. Па вэрсіі сьледзтва, удзельнік акцыі пратэсту, імя якога не называецца, двойчы стукнуў кулаком па галаве байца АМАПу. Паведамляецца, што падазраванага ўжо затрымалі.
У Чалябінску па выніках нядзельнай акцыі пратэсту распачатая крымінальная справа за перакрыцьцё дарог. У рамках расьсьледаваньня затрымалі 23 чалавекі, іх дапытваюць.
У Маскве заведзеная новая, другая за восем дзён, справа аб парушэньні санітарных правілаў, а таксама справа аб прывядзеньні ў непрыдатнасьць транспарту і дарог — у ёй дапытваюць затрыманых у нядзелю ўвечары апазыцыйных палітыкаў Ілью Яшына і Андрэя Піваварава.
Акрамя таго, у Маскве праводзяцца дзьве дасьледчыя праверкі: аб падпале службовага аўтамабіля «Росгвардии» і гвалце ў дачыненьні да прадстаўніка ўлады. Паведамляецца, што падазраваны ў другой справе ўжо затрыманы: ён нібыта спрабаваў ударыць бэйсбольнай бітай супрацоўніка АМАПу.
