Злучаныя Штаты рашуча асуджаюць жорсткую тактыку абыходжаньня з пратэстоўцамі і журналістамі. Раней расейскі ўрад імкнуўся душыць права грамадзян на мірныя сходы і свабоду выказваньня меркаваньняў, загадзя падвяргаючы арышту патэнцыйных удзельнікаў акцый.
Цяпер жа ў Вашынгтоне разглядаюць арышт апазыцыянэра Аляксея Навальнага і здушэньне пратэстных акцый як «трывожныя прыкметы далейшых» абмежаваньняў грамадзянскай супольнасьці і асноўных свабодаў.
Правы расейцаў на мірныя сходы і ўдзел у свабодных і справядлівых выбарах замацаваныя ня толькі ў канстытуцыі краіны, але і ў абавязацельствах Расеі перад АБСЭ, Усеагульнай дэклярацыі правоў чалавека і ў міжнародных абавязацельствах па Міжнароднаму пакту аб грамадзянскіх і палітычных правах, падкрэсьліваецца ў заяве Дзярждэпартамэнта ЗША.
ЗША заклікаюць расейскія ўлады вызваліць усіх тых, хто быў затрыманы за адно толькі ажыцьцяўленьне сваіх правоў, і да неадкладнага і безумоўнага вызваленьня Аляксея Навальнага, гаворыцца ў заяве.
Вашынгтон заклікае Расею напоўніцу супрацоўнічаць з міжнароднай супольнасьцю ў расьсьледаваньні атручваньня Аляксея Навальнага і растлумачыць — годным даверу чынам — ужываньне хімічнай зброі на тэрыторыі Расеі.
Злучаныя Штаты разам са сваімі саюзьнікамі і партнэрамі па абароне правоў чалавека будуць і надалей адстойваць правы чалавека, дзе б яны ні падвяргаліся пагрозам — няхай гэта будзе ў Расеі або ў іншых краінах, заяўляе Дзяржаўны дэпартамэнт ЗША.
