Горадня: кропкавыя затрыманьні
Пратэстоўцы разьмеркаваліся па вуліцах і дварах цэнтру Горадні. На Савецкую плошчу прыехаў аўтазак і міліцэйскія мікрааўтобусы. Працягваюцца кропкавыя затрыманьні.
Пры затрыманьнях былі выпадкі, калі сілавікі распылялі сьлезацечны газ.
Ва ўсіх журналістаў, якія працуюць на пратэставай акцыі, праверылі дакумэнты, правялі прафіляктычныя гутаркі і адпусьцілі.
Менск: людзі групуюцца насупраць стэлы
Людзі працягваюць зьбірацца насупраць стэлы «Менск – горад-герой» і нікуды далей ня рухаюцца. З боку Нямігі ідзе яшчэ адна калёна. Скрыжаваньне праспэкта Пераможцаў з праспэктам Машэрава цалкам занялі пратэстоўцы, у іх шмат бела-чырвона-белых сьцягоў.
Праваабаронца Алесь Бяляцкі ацаніў колькасьць у два дзясяткі тысяч, новыя калёны далучаюцца. Пачынаецца дождж. Уздоўж стэлы стаяць вайскоўцы, АМАПу не відаць.
На праспэкце Пераможцаў з аднаго з бальконаў дома насупраць Стэлы вывесілі вялікі бел-чырвона-белы сьцяг – ён закрывае тры паверхі.
У Гомлі пачаліся затрыманьні
У Гомлі пачаліся затрыманьні. На пратэстоўцаў на Савецкай напаў АМАП, адціскае да ўнівэрмагу «Гомель», але людзі туды не ідуць – кажуць, пастка
Чуваць стрэлы ў паветра на вуліцы Савецкай насупраць цырку. Хапаюць людзей.
Міліцыя пацьвердзіла расейскаму інфармацыйнаму агенцтву ТАСС, што ўжывала супраць пратэстоўцаў сьвятлошумавыя гранаты і сьлезацечны газ.
У Магілёве затрымалі журналіста
У Магілёве падчас асьвятленьня акцыі пратэсту затрыманы журналіст інтэрнэт парталу «Рэгіянальны Магілёў» Уладзімер Лапцэвіч.
Горадня: пратэстоўцы крочаць па горадзе, пакуль без затрыманьняў
Людзі перайшлі ў раён аўтавакзала. За імі прыехалі аўтазакі. Калёна сілавікоў пахадзіла вакол, нікога не хапалі. Калёна зь дзясяткаў чалавек рушыла па вуліцы Карла Маркса і Сацыялістычнай у бок драмтэатру, а таксама іншымі вуліцамі ў бок цэнтру. З бальконаў людзі крычаць «Жыве Беларусь».
Бабруйск: пратэстоўцы гуляць пад «Священной войны»
Пасьля дажджу на цэнтральнай плошчы Бабруйска сабралася каля сотні чалавек. Спачатку зь імі гутарылі міліцыянты, потым — журналіст. Пасьля калёна рушыла па горадзе пад гукі «Священной войны».
Гомель: пратэстоўцы калёнай рушылі па горадзе
Калёна пратэстоўцаў пачала рухацца па вуліцы Савецкай.
Дзясяткі тысяч пратэстоўцаў на Маршы ў Менску
Пратэстоўцы занялі праезную частку праспэкта Пераможцаў і ідуць да Стэлы, фармуюць калёну зь 5 тысяч чалавек, паводле ацэнак карэспандэнтаў Свабоды. Да іх далучаецца калёна з вуліцы Мельнікайтэ.
Карэспандэнты Свабоды ацэньваюць колькасьць людзей на маршы пратэсту ў Менску ў дзясяткі тысяч. Плякатаў у пратэстоўцаў мала, затое шмат нацыянальных сьцягоў і сьцягоў мікрараёнаў. Ёсьць партрэты Ціханоўскай, у тым ліку з подпісам «Сьвета ў канцы тунэлю».
Людзі крычаць «Уходи!» Да асноўнай калёны на праспэкце Пераможцаў далучаюцца пратэстоўцы з іншых прылеглых вуліц. Ля Стэлы музычная ўстаноўка вайскоўцаў спрабуе заглушыць крыкі натоўпу музыкай і зачытваньнем закону аб масавых мерапрыемствах.
АМАП ніякіх актыўных дзеяньняў не прадпрымае.Міліцыя праз мэгафон кажа, што акцыя несанкцыянаваная і папярэджвае пра наступствы.
Сотні чалавек усё ж сабраліся ў цэтры Гомля
Калёна да 1000 чалавек ідзе ў бок стэлы ў Менску
Каля кінатэатра «Масква» сфармавалася калёна на тысячу чалавек, ідуць па праспэкце Пераможцаў, рухаюцца ў бок стэлы «Менск — горад-герой».
На праспэкце Пераможцаў людзі ідуць дзьюма калёнамі, па двух тратуарах: ад гатэлю «Юбілейны» і ад Палацу спорту, на другім баку ракі. Зьявіліся дзясяткі сьцягоў і парасонаў. Усе ідуць да стэлы. Колькасьць пратэстоўцаў карэспандэнты Свабоды ацанілі ў тры тысячы чалавек. Людзі крычаць «Жыве Беларусь!» На прыступках стэлы стаяць вайскоўцы, уключылі гучную музыку.
У раёне стэлы людзі выйшлі на праезную частку праспэкту Пераможцаў.
А вось як затрымлівалі ў Горадні
У Горадні каля моладзевага цэнтру «Галяктыка» затрымалі некалькі чалавек.
Вядома, што сярод затрыманых у Горадні — галоўны рэдактара парталу NewGrodno Ігар Бублікаў.
У Менску затрымалі дзясяткі чалавек
Каля гатэлю «Юбілейны» працягваюцца затрыманьні, затрыманыя дзясяткі чалавек, сілавікі ў чорным выхопліваюць людзей з натоўпу, дзейнічаюць груба. Людзі крычаць: «Ганьба!»
У Гомлі людзей адціскаюць зь месцу збору
АМАП адціскае людзей ад сквэру Грамыкі, дзе сёньня зьбіраліся распачаць марш. Кажуць, «дзеяньні людзей незаконныя».
Менск. Затрыманьнні пачаліся на праспэкце Пераможцаў
Да гатэля «Юбілейны» пад’ехаў АМАП у чорным і аўтазакі, людзей гоняць далей ад праспэкта, пачаліся затрыманьні, карэспандэнты Свабоды налічылі 5 затрыманых у першыя хвіліны.
Сотні чалавек на праспэкце Пераможцаў у Менску
На праспэкце Пераможцаў сабраліся сотні людзей, яны разгрупаваліся па розных месцах, у тым ліку насупраць Палацу спорту, ля гатэлю “Юбілейны”. Агулам, паводле падлікаў карэспандэнтаў Свабоды, там гуляе некалькі соцень чалавек, актыўных дзеяньняў яны ня робяць, часам пляскаюць у ладкі.
Тым часам сілавікі пільна аглядаюць рэчы людзей на праспэкце Пераможцаў.
Міліцыя не дае людзям сабрацца ў цэнтры Магілёву
Міліцыя не дае прыхільнікам пераменаў сабрацца на плошчы ля гандлёвага цэнтру «Атрыюм», зь якой традыцыйна пачынаюцца акцыі пратэсту. У тых, хто на лаўках, правяраюць торбы і патрабуюць выдаліць фатаздымкі зь міліцыяй з мабільных тэлефонаў. На мясцовым прыпынку грамадзкага транспарту, закрытым пасьля 14 гадзінаў, стаіць аўтазак. Прылеглыя сквэры патрулююць амапаўцы. У дварах стаяць аўтобусы зь міліцыяй.
Жорсткія затрыманьні ў Горадні і Лідзе
У Горадні нечакана пачаліся жорсткія затрыманьні. Схапілі дзясяткі чалавек. Паміж сілавікамі і пратэстоўцаў і завязалася бойка.
А вось так затрымліваюць у Лідзе.
Вось як затрымлівалі на скрыжаваньні Машэрава і Пераможцаў у Менску
Людзі зьбіраюцца, на Нямізе зьявіліся першыя бела-чырвона-белыя сьцягі
Нягледзячы на кропкавыя затрыманьні, у раёне Нямігі ў Менску пачынаюць зьбірацца людзі, зьявіліся першыя нацыянальныя сьцягі на плячах у пратэстоўцаў, перадае карэспандэт Свабоды. Людзі ў раёне скрыжаваньня вуліцы Нямігі і праспэкта Пераможцаў гуляюць, у калёны не зьбіраюцца. Мікрааўтобусы з сілавікамі езьдзяць, папярэджваюць патэнцыйных удзельнікаў маршу.
У Менску пачаліся затрыманьні ўдзельнікаў пратэстнай акцыі
Супрацоўнікі праваахоўных органаў у Менску ў нядзелю пачалі затрымліваць удзельнікаў чарговага несанкцыянаванага маршу апазыцыі.
Як перадае «Інтэрфакс», пратэстоўцы зьбіраюцца ў спальных раёнах і калёнамі рухаюцца да цэнтру гораду. Тым часам сілавікі імкнуцца не дапусьціць іх прыходу ў цэнтр. Людзей затрымліваюць па дарозе на акцыю на прылеглых да праспэкту Незалежнасьці вуліцах. Каля 10 чалавек затрымалі на падыходах да праспэкта Машэрава. Людзі накіроўваліся да стэлы «Мінск горад-герой».
У ГУУС Менскага гарвыканкама агенцтву «Інтэрфакс» пацьвердзілі факт затрыманьняў. «Ёсьць некалькі затрыманых у рамках адміністрацыйнага працэсу», – паведаміла афіцыйны прадстаўнік ГУУС Натальля Ганусевіч.