Падчас сёньняшняга маршу ў Менску затрымалі больш за 100 чалавек, у тым ліку былога камэнтатара «Беларусь 5» Уладзіслава Татура. Гэтае затрыманьне трапіла на відэа, паведамляе Tut.by.
20 жніўня стала вядома, што спартовыя камэнтатары тэлеканалу «Беларусь 5» Арташэс Антанян, Уладзіслаў Татур і Яраслаў Пісарэнка, а таксама кіраўнік аддзелу карэспандэнтаў Андрэй Іваноў напісалі заявы на звальненьне. Яны былі ня згодныя з палітыкай тэлерадыёкампаніі пасьля выбараў.
Як стала вядома Свабодзе ад прадстаўніка футбольнага клюбу «Крумкачы», у раёне Раманаўскай Слабады затрымалі футбалістаў клюбу Паўла Расольку і Сяргея Казеку. Яны вярталіся з трэніроўкі разам з трэнэрам Бялінскім. Міліцэйскія кардоны прайшлі, наляцеў АМАП, хлопцаў схапілі і зьбілі. Ім інкрымінуюць напад на міліцыю.Трэнэра не чапалі. Павал Расолька і Сяргей Казека ня ўдзельнічалі ў маршы пратэсту.
Раней гульцы «Крумкачоў» выйшлі на матч з «Хімікам» у футболках з надпісам «Мы з народам!»
