На 63-гадовую гарадзенку Станіславу Дамшэль завялі справу за дробнае хуліганства. Па ейных словах, да яе ног 29 траўня ўпаў той самы міліцыянт Уладзімер Казлоўскі падчас штурханіны на пікеце Ціханоўскай.
Як расказала Станіслава Дамшэль, 8 чэрвеня да яе дадому двойчы прыходзілі міліцыянты. Адзін раз быў міліцыянт у форме, другі раз — двое ў цывільным. Жанчына цяпер на добраахвотнай самаізаляцыі праз каранавірус, таму дзьвярэй нікому не адчыніла. Урэшце яны пагаварылі праз балькон.
Як расказала пэнсіянэрка, міліцыянты паведамілі, што на яе заведзеная адміністратыўная справа па ч. 1 арт. 17 КаАП.
«Я нікога не забівала, ня біла, нічога», — абураецца жанчына.
29 траўня яна хадзіла на пікет на Савецкай плошчы, каб пакінуць подпіс за Сьвятлану Ціханоўскую.
«Я нечакана стала сьведкай сытуацыі, калі бедненькі, маленькі міліцыянт упаў проста да маіх ног. Бяз стогну, без адзінага ўздыху...» — узгадвае жанчына.
Па ейных словах, другі міліцыянт у форме «нёсься проста на яе і штурхнуў яе з усіх сіл», парваў ёй торбу. Жанчына кажа, што магла ўпасьці, калі б яе не падтрымалі людзі са сьпіны. Яна зьдзіўляецца, чаму міліцыянт не дапамог свайму калегу падняцца зь зямлі.
«Цікава даведацца ў міліцыі, каго я прыбіла: міліцыянта, які застаўся валяцца на асфальце, ці таго, які зьбягаў ад свайго ляжачага прыяцеля... Вы ведаеце такіх бабуляў, якія ўсё жыцьцё нармальна жылі і ў 63 гады сталі хуліганкамі?» — разважае Станіслава.
У апошнія гады яна працавала прадпрымальніцай. Перажывае цяпер, што стала хуліганкай на пэнсіі, прыйшоўшы на мірны пікет. Вінаватай сябе ня лічыць.
У прэс-службе УУС журналісту БелаПАН ня сталі праз тэлефон адказваць на пытаньне журналіста пра дэталі справы супраць Станіславы Дамшэль.
Гэтая публікацыя падрыхтаваная з выкарыстаньнем інфармацыі БелаПАН.
Затрыманьні Ціханоўскага і яго прыхільнікаў. Што трэба ведаць
- Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
- У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
- Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
- Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».
- На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
- 14 сьнежня 2021 году Сяргея Ціханоўскага асудзілі на 18 гадоў зьняволеньня, прызнаўшы вінаватым паводле чатырох артыкулаў Крымінальнага кодэксу: ч. 1 арт. 293 (арганізацыя масавых беспарадкаў), ч. 3 арт. 130 (распальваньне сацыяльнай варожасьці); ч. 2 арт. 191 (перашкода працы ЦВК, заяву на яго падала старшыня ЦВК Лідзія Ярмошына), ч. 1 арт. 342 (арганізацыя дзеяньняў, што груба парушаюць грамадзкі парадак).
- Пасьля прысуду Ціханоўскі спачатку трапіў у папраўчую калёнію № 15 Магілёва. Але ў жніўні 2022-га яму ўзмацнілі рэжым і перавялі на 3 гады ў турму № 8 у Жодзіне, дзе зноў судзілі і дадалі яшчэ 1,5 года зьняволеньня за «непадпарадкаваньне патрабаваньням адміністрацыі». Агулам тэрмін зьняволеньня Сяргея Ціханоўскага цяпер складае 19,5 года.
- З сакавіка 2023 году сваякі Сяргея Ціханоўскага не атрымліваюць аніякай інфармацыі ад яго.
- Беларускія праваабаронцы прызналі Ціханоўскага палітычным зьняволеным.
- ПА АБСЭ і Эўрапарлямэнт патрабавалі вызваленьня Ціханоўскага, Статкевіча і іх паплечнікаў.
