Ці праўда, што паказьнік сьмяротнасьці ад каранавірусу ў Беларусі — найлепшы ў сьвеце?

Насамрэч

Няпраўда.

20 траўня колькасьць афіцыйна прызнаных сьмерцяў інфікаваных COVID-19 у Беларусі складала 19 чалавек на 1 мільён насельніцтва. Гэта і сапраўды даволі нізкі нізкі паказьнік у сьвеце, але ня самы нізкі, ня самы лепшы.

Паводле дадзеных сайта Worldometers , які зьбірае афіцыйныя зьвесткі пра распаўсюд COVID-19 па 214 краінах і тэрыторыях, у 65 краінах сьмяротнасьць ад каранавірусу на мільён насельніцтва вышэйшая, чым у Беларусі. А ў 148 краінах і тэрыторыях сьмяротнасьць ад COVID-19 ніжэйшая — лепшая, кажучы словамі Лукашэнкі, — чым у Беларусі.

Беларускі паказьнік сьмяротнасьці ад каранавірусу не найлепшы і ў Эўропе. Меншы, чым у Беларусі, ён у Баўгарыі, Грэцыі, Чарнагорыі, Украіне, Латвіі, Альбаніі і Славаччыне.