Прэм’ер-міністар Новай Зэляндыі Джасінда Ардэрн заявіла, што краіне «удалося пазьбегнуць горшага» ў сувязі з эпідэміяй каранавіруснай інфэкцыі, і цяпер эпідэмія ў краіне спыненая.
На працягу некалькіх апошніх дзён у Новай Зэляндыі выяўляюць толькі адзінкі новых выпадку заражэньня. Усяго ў краіне зафіксавана менш за 1500 тых, хто захварэў, памерлі 19 чалавек.
Паводле Ардэрн, у краіне ўдалося спыніць некантраляванае пашырэньне інфэкцыі. Адмыслоўцы могуць адсачыць крыніцу кожнага новага заражэньня і ўсе кантакты заражаных і трымаць распаўсюджваньне каранавірусу пад кантролем.
Новая Зэляндыя ўвяла строгія абмежавальныя меры ў самым пачатку эпідэміі. Былі хутка перакрытыя мяжы, уведзены строгі карантын для ўсіх, хто вяртаўся з-за мяжы, зачыненыя для наведваньняў грамадзкія месцы, кавярні і рэстарацыі (ім было забаронена нават працаваць на вынас або праз сэрвісы дастаўкі). Дзякуючы гэтым мерам краіне фактычна ўдалося прадухіліць эпідэмію.
Новая Зэляндыя ў панядзелак зьняла частку абмежаваньняў. Улады падкрэсьліваюць, што гаворка пойдзе пра адкрыцьцё эканомікі, а ў грамадзкім жыцьці пакуль захаваюцца абмежаваньні.
Новая Зэляндыя ўвайшла ў лік краінаў, дзе распаўсюджваньне інфэкцыі практычна ўдалося спыніць, — разам з Паўднёвай Карэяй, Віетнамам, Аўстраліяй і Кітаем, дзе за апошнія суткі зафіксаваныя толькі тры новыя выпадкі інфікаваньня.
