У Міністэрстве адукацыі назвалі адкрыцьцё школ апраўданым крокам і заявілі, што настаўнікі не павінны праводзіць урокі ў клясах, а потым весьці онлайн-навучаньне для адсутных.
«Пэдагогі не павінны весьці ўрокі дыстанцыйна. У нас арганізаваны навучальны працэс у школах, дзе яны даюць дзецям матэрыял. Пасьля ўрокаў адсутным можа быць выдадзена толькі хатняе заданьне», — заявіла агенцтву Інтэрфакс прэс-сакратарка Мінадукацыі Людміла Высоцкая.
Паводле яе, адсутныя на занятках дзеці, калі трэба, могуць атрымаць кансультацыі ад настаўнікаў асабіста, па электроннай пошце ці прыйсьці ў школу ў шосты навучальны дзень — суботу.
У міністэрстве лічаць адкрыцьцё школ цалкам апраўданым крокам.
«Дзеці ж усё роўна дома не сядзяць увесь час. А ў школе яны, можа, знаходзяцца яшчэ ў большай бясьпецы», — адзначыла прэс-сакратарка Мінадукацыі.
Паводле Мінадукацыі, у параўнаньні зь першым днём 4-й чвэрці вучняў у школах стала больш: 20 красавіка ў школы выйшлі 30–40% вучняў.
Як будуць атэстоўваць тых дзяцей, бацькі якіх вырашылі да канца навучальнага году пакінуць іх дома, пакуль канчаткова ня вырашылі.
Як заявіў 23 красавіка ў эфіры тэлеканала «Беларусь 1» намесьнік міністра адукацыі Аляксандар Кадлубай, разглядаецца варыянт, што вучняў школ, якія ў чацьвёртай чвэрці не наведваюць урокі ў клясах, могуць атэставаць па выніках першых трох чвэрцяў.
«Я не выключаю тое, што бацькі, як яны выказваюцца ў камэнтарах, палічаць, што здароўе іх дзяцей першаснае... У такім выпадку дзеці будуць атэставаныя па выніках тых адзнак, якія яны атрымалі ў трох чвэрцях. Гэта дазваляюць правілы атэстацыі», — сказаў Аляксандар Кадлубай.
Паводле яго, Мінадукацыі неўзабаве прыме дакумэнт, які растлумачыць, як ацэньваць веды пры вочным і завочным навучаньні.
Экзамены і выпускныя для школьнікаў, а таксама ўступную кампанію ў ВНУ плянуюць правесьці ў традыцыйныя тэрміны, аднак пры зьмене абставінаў гэтае рашэньне могуць перагледзець.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
