Паліцыя ў чарнагорскай Падгорыцы затрымала мітрапаліта Сэрбскай праваслаўнай царквы Амфілохія і яшчэ 20 чалавек, пераважна сьвятароў, паведамляе карэспандэнт Радыё Свабода.
Іх затрымалі за парушэньне рашэньня ўрада, якім праз каранавірус забароненыя ўсе сходы. Чарнагорскія СМІ паведамляюць, што мітрапаліт раніцай адпраўляў літургію ў адной са сталічных цэркваў.
На сайце мітраполіі апублікавалі відэазапіс набажэнства, на якім бачна некалькі дзясяткаў сьвятароў і манахіняў, сярод якіх ёсьць і сьвецкія.
Прадстаўнік паліцыі заявіў, што пракуратура пасьля допыту ўстановіць, гаворка ідзе аб парушэньні грамадзкага парадку ці пра незаконнае дзеяньне.
Як праваслаўныя сьвяткуюць Вербніцу ў час пандэміі. ФОТАРЭПАРТАЖ
Мітрапаліта Амфілохія ў Чарнагорыі лічаць нефармальным лідэрам прасэрбскай апазыцыі.
Праз COVID-19 у Чарнагорыі забаронены ўсе масавыя сходы. Вірусам захварэлі 267 чалавек, трое памерлі.
У Сэрбіі ад каранавіруса памёр адзін уладыка Сэрбскай праваслаўнай царквы, які не выконваў самаізаляцыі, некалькі сьвятароў знаходзяцца ў крытычным стане.