Гандляры ў масках і антысэптыкі для кліентаў. Як выглядае Віцебск у першы дзень «Славянскага базару». ФОТА
У дзень афіцыйнага адкрыцьця «Славянскага базару» 16 ліпеня на вуліцах Віцебску людзей стала больш пасьля пятай гадзіны ўвечары. Чацьвер — працоўны дзень, а турыстаў на фэстывалі сёлета няшмат.
Арганізатары «Славянскага базару» не абвяшчалі абавязковы масачны рэжым на фэстывальных мерапрыемствах, большасьць якіх у гэтым годзе мае вулічны фармат. Рэкамэндацый рассаджваць гледачоў праз аднаго таксама не прагучала. Ці захоўваюць адлегласьць слухачы, якія зьбіраюцца перад адкрытымі гарадзкімі пляцоўкамі, ніхто не адсочвае. Чытайце рэпартаж па спасылцы.
Рэкордную колькасьць новых выпадкаў COVID-19 зарэгістравалі ў ЗША
Рэкордная колькасьць новых выпадкаў COVID-19 — 77 000 — выявілі ў ЗША 16 ліпеня. Каля 1000 чалавек загінулі за гэты дзень. У Флорыдзе, Паўднёвай Караліне і Тэхасе была самая вялікая колькасьць выпадкаў за адзін дзень.
Усяго ў Злучаных Штатах зафіксавалі каля 3,6 мільёна выпадкаў COVID-19. Памерлі 138 тысяч чалавек.
Службы аховы здароўя ЗША папярэджваюць, што колькасьць новых выпадкаў неўзабаве можа дасягнуць 100 000 штодзень. У той жа час нашэньне маскі зьяўляецца абавязковым у палове штатаў.
ЦВК апублікаваў рэкамэндацыі Міністэрства здароўя для прадухіленьня пашырэньня COVID-19 пры галасаваньні на выбарах
У пераліку 14 рэкамэндацый:
- арганізаваць перад пачаткам працы апытаньне кожнага чальца ўчастковай камісіі пра стан здароўя. Да працы ўчастковай камісіі дапускаць асобаў без прыкмет рэсьпіраторнай інфэкцыі (падвышаная тэмпэратура цела, кашаль, чханьне і інш.);
- забясьпечыць наяўнасьць і выкарыстаньне чальцамі ўчастковай камісіі сродкаў засьцярогі (маска, пальчаткі, пры магчымасьці тваравы шчыток), сродкаў дэзынфэкцыі для апрацоўкі рук і паверхняў;
- забясьпечыць выкананьне прынцыпу сацыяльнага дыстанцыяваньня пры расстаноўцы сталоў і крэслаў чальцоў участковай камісіі, месцаў для назіральнікаў, паміж выбарнікамі, забясьпечыўшы адлегласьць, ня меншую за адзін мэтар, адзін ад аднаго;
- забясьпечыць наяўнасьць у месцах агульнага доступу (калідоры, фае і інш.) сродкаў для дэзынфэкцыі скуры / антысэптыку для апрацоўкі рук і кантроль рэгулярнай запраўкі дазатараў;
- па магчымасьці арганізаваць падзел патокаў асобаў, якія ўваходзяць і якія выходзяць, разьмясьціўшы адпаведныя паказальнікі на падлозе, дзьвярах або сьценах;
- рэкамэндаваць выбарнікам пры наведваньні ўчастку для галасаваньня знаходзіцца ў сродках індывідуальнай засьцярогі (масцы, пальчатках), а таксама выкарыстоўваць гэтыя сродкі пры арганізацыі для іх галасаваньня па месцы знаходжаньня (дома). На просьбу чальца ўчастковай камісіі выбарнік ссоўвае маску і паказвае твар, каб быць ідэнтыфікаваным;
- рэкамэндаваць выбарнікам прадʼяўляць дакумэнт, які пацьвярджае асобу, у разгорнутым выглядзе, дэманструючы неабходныя старонкі самастойна, безь перадачы ў рукі чальца ўчастковай камісіі;
- рэкамэндаваць выбарнікам выкарыстоўваць уласныя аўтаручкі для подпісаў аб атрыманьні бюлетэня ў сьпісе грамадзян, якія маюць права ўдзельнічаць у выбарах, а таксама для запаўненьня бюлетэня;
- забясьпечыць апрацоўку аўтаручак антысэптыкам пасьля кожнага выбарніка;
- арганізаваць правядзеньне рэгулярнай апрацоўкі (не радзей за 6 разоў цягам дня выбараў) сродкамі дэзынфэкцыі дзьвярных ручак, поручняў, паверхняў у кабінах для галасаваньня, сталоў ды іншых кантактных паверхняў. У дні датэрміновага галасаваньня забясьпечыць таксама правядзеньне вільготнай прыборкі памяшканьня, дзе праводзіцца галасаваньне, падчас перапынку з 14 да 16 гадзін;
- рэкамэндаваць трымаць дзьверы ў памяшканьне для галасаваньня і іншыя памяшканьні, празь якія перамяшчаюцца выбарнікі, адчыненымі;
- арганізаваць рэгулярнае праветрываньне памяшканьняў (безь перапыненьня працэсу галасаваньня). У дні датэрміновага галасаваньня забясьпечыць праветрываньне ў перапынку з 14 да 16 гадзін;
- пасьля завяршэньня галасаваньня апрацаваць звонку скрыню для галасаваньня дэзынфэкцыйным сродкам, а пры арганізацыi галасаваньня па месцы знаходжаньня выбарніка апрацоўваць скрыню для галасаваньня пасьля наведваньня кожнага выбарніка;
- галасаваньне па месцы знаходжаньня выбарніка па магчымасьці праводзіць без уваходжаньня ў жылое памяшканьне і з захаваньнем прынцыпу сацыяльнага дыстанцыяваньня, прытрымліваючыся адлегласьці ня менш за адзін мэтар адзін ад аднаго.
155 новых выпадкаў, 6 прызнаных сьмерцяў. Афіцыйная статыстыка COVID-19 у Беларусі на 14 ліпеня
Паводле Міністэрства аховы здароўя, на 14 ліпеня ў Беларусі:
- агулам 65 269 чалавек са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 474 памерлі, з памерлых усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 55 799 пацыенты паправіліся і выпісаныя пасьля COVID-19;
- гэта значыць, за дзень выявілі яшчэ 155 выпадкаў і прызналі яшчэ 6 сьмерцяў, выпісалі 307 чалавек;
- такім чынам, колькасьць «актыўных выпадкаў» — 8996; «актыўных выпадкаў» стала больш на 158, хоць за дзень да таго вырасла на 66;
- ад пачатку эпідэміі ў краіне зрабілі 1 144 696 тэстаў і 3116 на дзень, зь якіх 4,97% былі станоўчымі (хоць днём раней было 6,9 тысячы тэстаў і 2,63% станоўчых, два дні таму — 11,5 тысячы тэстаў і 1,44% станоўчых);
- колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісалі дамоў на «амбуляторнае лячэньне», не паведамляюць.
Гэтым лічбам выказваюць недавер валянтэры і некаторыя мэдыкі, лічбы зьдзіўляюць знаёмых з законамі матэматычнай статыстыкі.
«Занадта шмат краінаў пайшлі ў няправільным кірунку», — САЗ пра барацьбу з каранавірусам
Сусьветная арганізацыя аховы здароўя лічыць, што сытуацыя, зьвязаная з пандэміяй каранавірусу, будзе станавіцца ўсё «горш і горш». Генэральны дырэктар САЗ Тэдрас Аданом Гебрэесус заявіў 13 ліпеня, што «занадта шмат краінаў пайшлі ў няправільным кірунку».
Колькасьць выпадкаў заражэньня працягвае расьці там, дзе правераныя захады процідзеяньня альбо не ўжываліся, альбо не выконваліся, сказаў кіраўнік САЗ.
Цяпер у Паўночнай і Паўднёвай Амэрыкі найбольш цяжкая становішча. У ЗША, дзе выяўлена 3,3 мільёна інфікаваных, у апошні час расла напружанасьць у стасунках паміж мэдыцынскімі экспэртамі і прэзыдэнтам Трампам. Пацьверджаных сьмерцяў ад каранавірусу ў ЗША — 135 тысяч. Такія дадзеныя ўнівэрсытэту Джонза Гопкінза.
Пандэмія каранавірусу можа пабольшыць колькасьць галодных на сьвеце на 132 мільёны чалавек, — ААН
Колькасьць людзей, якія адчуваюць хранічны голад, можа да канца гэтага году пабольшыцца на 132 мільёны з прычыны пандэміі каранавірусу, гаворыцца ў справаздачы ААН, апублікаванай 13 ліпеня.
«З папярэдняй ацэнкі вынікае, што пандэмія можа дадаць ад 83 да 132 мільёнаў чалавек да агульнай колькасьці тых, хто недаядае ў 2020 годзе», — сьцьвярджае дакумэнт, падрыхтаваны пяцьцю агенцтвамі ААН на аснове глябальнага эканамічнага прагнозу.
Паводле зьвестак ААН, на працягу 2019 году колькасьць галодных людзей павялічылася на 10 мільёнаў і напрыканцы году склала 690 мільёнаў, або 9% насельніцтва плянэты.
Ужо больш за 65 тысяч выпадкаў. Афіцыйная статыстыка COVID-19 у Беларусі на 13 ліпеня
Паводле Міністэрства аховы здароўя, на 13 ліпеня ў Беларусі:
- агулам 65 114 чалавек са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 468 памерлі, з памерлых усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 55 492 пацыенты паправіліся і выпісаныя пасьля COVID-19;
- гэта значыць, за дзень выявілі яшчэ 182 выпадкі і прызналі яшчэ 4 сьмерці, выпісалі 112 чалавек;
- такім чынам, колькасьць «актыўных выпадкаў» — 9154; «актыўных выпадкаў» стала больш на 66, хоць да таго цэлы тыдзень іх колькасьць зьмяншалася;
- ад пачатку эпідэміі ў краіне зрабілі 1 141 580 тэстаў.
Армэнія чацьвёрты раз працягвае рэжым надзвычайнага становішча
Урад Армэніі сёньня на пазачарговым пасяджэньні ўхваліў працяг яшчэ на месяц, да 12 жніўня, рэжыму надзвычайнага становішча, уведзенага ў краіне з 16 сакавіка ў сувязі з эпідэміяй каранавірусу. Гэта ўжо чацьвёртае падаўжэньне рэжыму надзвычайнага становішча.
Паводле заканадаўства Армэніі, толькі надзвычайнае становішча дазваляе ўладам забясьпечыць абавязковае нашэньне масак у грамадзкіх месцах ды іншыя антывірусныя захады.
Мёд і крыніца. Лукашэнка назваў новы «рэцэпт» ад каранавірусу
Падчас візыту ў Слаўгарадзкі раён 13 ліпеня Аляксандар Лукашэнка наведаў Блакітную крыніцу (таксама вядомую як Сіні калодзеж), што ў 4 км на поўнач ад вёскі Дубна. Там ён агучыў чарговы сумнеўны «сродак ад каранавірусу». «Сюды трэба прыяжджаць ад пандэміі лячыцца. Мёду пакаштаваў, акунуўся…» — перадае словы Лукашэнкі ягоная прэс-служба, якая адзначае, што ён заявіў гэта «з доляй гумару».
Даказана эфэктыўных лекаў ад COVID-19, як і вакцыны ад вірусу SARS-CoV-2, па-ранейшаму няма — існуюць толькі экспэрымэнтальныя патэнцыйныя лекі, распрацоўваюцца патэнцыйныя вакцыны. Цалкам чытайце тут.
У Казахстане — дзень жалобы па памерлых ад COVID. Іх прэзыдэнт: «Гэта наша агульная трагедыя»
13 ліпеня, у Казахстане — дзень агульнанацыянальнай жалобы ў памяць пра ахвяраў эпідэміі каранавірусу. У дзень жалобы адмененыя забаўляльныя мерапрыемствы і перадачы. У найбуйнейшых мячэцях краіны прачытаюць памінальныя малітвы, а ў храмах пройдуць набажэнствы і паніхіды.
Паводле афіцыйных дадзеных, колькасьць тых, хто захварэлі каранавіруснай інфэкцыяй у краіне наблізілася да 60 000. У краіне за апошнія суткі каранавірус пацьвердзіўся яшчэ ў 1 646 чалавек. Цалкам чытайце тут.
COVID-19 у сьвеце: многія краіны вяртаюць абмежаваньні
Ва Ўсходняй Эўропе многія краіны вяртаюцца да абмежавальных захадаў, што часам выклікае пратэст. Людзі прывозяць вірус з адпачынку. Агляд сытуацыі з каранавірусам у сьвеце на 13 ліпеня.
165 новых выпадкаў і 5 прызнаных сьмерцяў. Афіцыйная статыстыка COVID-19 у Беларусі на 12 ліпеня
Паводле Міністэрства аховы здароўя, на 12 ліпеня ў Беларусі:
- агулам 64 932 чалавекі са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 464 памерлі, з памерлых усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 55 380 пацыенты паправіліся і выпісаныя пасьля COVID-19;
- гэта значыць, за дзень выявілі яшчэ 165 выпадкаў і прызналі яшчэ 5 сьмерцяў, выпісалі 461 чалавека;
- такім чынам, колькасьць «актыўных выпадкаў» 9088;
- ад пачатку эпідэміі ў краіне зрабілі 1 134 653 тэсты;
- колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісалі дамоў на «амбуляторнае лячэньне», не паведамляюць.
«Спартовы лад жыцьця дапамог майму дзеду ўратавацца ад каранавірусу», — тайбаксэр Дзьмітры Валент
Адзін з наймацнейшых беларускіх тайбаксэраў Дзьмітры Валент расказаў Свабодзе, як эпідэмія каранавірусу закранула ягоную сям’ю і парушыла пляны на чарговы чэмпіёнскі пояс.
163 новыя выпадкі і 5 прызнаных сьмерцяў. Афіцыйная статыстыка COVID-19 у Беларусі на 11 ліпеня
Паводле Міністэрства аховы здароўя, на 11 ліпеня ў Беларусі:
- агулам 64 767 чалавекі са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 459 памерлі, з памерлых усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 54 919 пацыенты паправіліся і выпісаныя пасьля COVID-19;
- гэта значыць, за дзень выявілі яшчэ 163 выпадкі (апошні раз было менш 7 красавіка) і прызналі яшчэ 5 сьмерцяў, выпісалі 665 чалавек;
- такім чынам, колькасьць «актыўных выпадкаў» зьменшылася на 507, цяпер хворых у афіцыйнай статыстыцы 9389;
- ад пачатку эпідэміі ў краіне зрабілі 1 123 158 тэстаў (гэта 11 244 за дзень, зь іх станоўчыя 1,41% — рэкордна малы адсотак за ўвесь час);
- колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісалі дамоў на «амбуляторнае лячэньне», не паведамляюць.
Гэтым лічбам выказваюць недавер валянтэры і некаторыя мэдыкі, лічбы зьдзіўляюць знаёмых з законамі матэматычнай статыстыкі.
Пратэсты ў Бялградзе: пасьля сутыкненьняў паліцыя разагнала дэманстрантаў сьлезацечным газам
Вечарам 10 ліпеня ў сталіцы Сэрбіі адбыліся жорсткія сутыкненьні дэманстрантаў з паліцыяй пад будынкам парлямэнту. Нагодай да пратэсту стала ўвядзеньне камэнданцкага часу ў сувязі з пандэміяй каранавірусу.
Як расказвае Радыё Свабодная Эўропа, некалькі сотняў хуліганаў нападалі на паліцыю пад будынкам парлямэнту ў Бялградзе. Акцыя пачыналася мірна, у ёй удзельнічалі тысячы грамадзянаў, але пасьля пачатку сутыкненьняў асноўная частка дэманстрантаў адышла ад хуліганаў і назірала за бойкамі здалёк.
Група хуліганаў каля 9-й вечара пачала кідаць пэтарды, дымавыя шашкі і бутэлькі ў галоўны ўваход у парлямэнт, замінала журналістам здымаць гэта. Яны выкрыквалі лёзунгі супраць прэзыдэнтаў Сэрбіі і Чарнагорыі, супраць незалежнасьці Косава, скандавалі імя асуджанага за ваенныя злачынствы Ратка Младзіча. У паліцыю кідалі бутэлькі, камяні і пэтарды.
Лукашэнка: праз тыдзень-два мы забудзем пра каранавірус
Такую заяву кіраўнік Беларусі зрабіў сёньня падчас выступу перад працаўнікамі менскага вытворчага аб’яднаньня «Атлянт».
Сярод іншага, ён сказаў, што ў Беларусі заробкі прыватных фірмаў павінны быць не ніжэйшыя за ўзровень дзесяці вядучых прадпрыемстваў дзяржаўнага сэктару, такіх як МАЗ, «Атлянт» і іншых.
Закрануў кіраўнік краіны і тэму пандэміі, карантыну і локдаўну ў розных краінах сьвету. На ягоную думку, Беларусь зрабіла правільна, што не спыняла вытворчасьці. Перайшоўшы на беларускую мову, Лукашэнка сказаў, што калі сьвет, «як у народзе кажуць скукарожыўся», мы выстаялі, вырабілі прадукцыю, і цяпер маем што прадаваць тым, хто выходзіць з карантыну.
Таксама Лукашэнка агучыў прагноз у справе эпідэміі ў Беларусі. Праз тыдзень-два, як кажуць мне лекары, мы перастанем адчуваць і размаўляць на тэму каранавірусу, — сказаў ён.
193 новыя выпадкі і 5 сьмерцяў. Афіцыйная статыстыка COVID-19 у Беларусі на 10 ліпеня
Паводле Міністэрства аховы здароўя, на 10 ліпеня ў Беларусі:
- агулам 64 604 чалавекі са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 454 памерлі, з памерлых усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 54 254 пацыенты паправіліся і выпісаныя пасьля COVID-19;
- гэта значыць, за дзень выявілі яшчэ 193 выпадкі і прызналі яшчэ 5 сьмерцяў, выпісалі 645 чалавек;
- такім чынам, колькасьць «актыўных выпадкаў» зьменшылася на 457, цяпер хворых у афіцыйнай статыстыцы 9896;
- ад пачатку эпідэміі ў краіне зрабілі 1 111 614 тэстаў (гэта 12 043 за дзень, зь іх пасьпяховыя 1,6%, хоць 6 і 7 ліпеня было 4% і 5%).
Брытанец, які прыяжджаў у Менск на парад, захварэў на COVID-19 і ледзь не памёр
Брытанец Бэнджамін Рыч езьдзіць па краінах былога СССР, здымае пра іх гісторыі і вядзе канал Bald and Bankrupt, у якога амаль 2 мільёны падпісчыкаў на Youtube. У канцы красавіка ён прыехаў у Менск, каб трапіць на парад Перамогі ў краіне, дзе не было локдаўну. Нядаўна падпісчыкі блогера заўважылі, што ён прапаў. Высьветлілася, той захварэў COVID-19 і некалькі тыдняў правёў у лякарні, зь іх дзевяць дзён — у рэанімацыі.
«Калі ласка, успрымайце хваробу сур'ёзна і не рабіце памылак, якія дапусьціў я», — напісаў Бэнджамін Рыч ў апісаньні да свайго новага відэа. Блогер лічыць, што захварэў у Сэрбіі. Цалкам чытайце па спасылцы.
Беларусь і МВФ ня могуць дамовіцца пра «каранавірусны крэдыт»
Міжнародны валютны фонд працягвае перамовы зь беларускімі ўладамі аб пазыцы ў памеры 940 млн даляраў на барацьбу з каранавірусам. Але захоўваецца шэраг рознагалосьсяў.
Пры гэтым Аляксандар Лукашэнка 19 чэрвеня заявіў, што краіна ня будзе выконваць патрабаваньняў МВФ. Ён заявіў, што дадатковыя ўмовы, якія ня тычацца фінансавай часткі пагадненьня, непрымальныя.
«Будзе вызначана захадамі, якія робяцца ў краіне». САЗ пра другую хвалю COVID-19 у Беларусі
У Сусьветнай арганізацыі здароўя сказалі, што ня могуць прадказаць другую хвалю каранавірусу ў асобнай краіне, у тым ліку ў Беларусі. На пытаньні карэспандэнта Свабоды адказаў афіцыйны прадстаўнік Эўрапейскага бюро САЗ Джэймз Крэсўік.
Ці дастаткова Беларусь гатовая да другой хвалі і што рэамэндуе САЗ, чытайце па спасылцы.