Аляксандар Лукашэнка падпісаў 3 студзеня ўказ №1 у 2020 годзе, піша ягоная прэс-служба.
Гэтым указам генэрал-лейтэнант Станіслаў Зась вызваляецца з пасады Дзяржаўнага сакратара Рады бясьпекі ў сувязі зь пераходам на іншую працу.
Пра новую працу Зася было вядома яшчэ ў лістападзе мінулага году — ён атрымаў пасаду генэральнага сакратара Арганізацыі дамовы аб калектыўнай бясьпецы. Паўнамоцтвы перайшла да яго ад 1 студзеня на тры гады. Раней — пакуль не было распараджэньня пра звальненьне — меркавалася, што ён можа захаваць пасаду і ў Беларусі.
Хто зойме пасаду Зася ў Радзе бясьпекі, пакуль не паведамлялася.
У 2019 і 2018-м першымі ўказамі Лукашэнкі за год былі ўказы аб прысуджэньні прэзыдэнцкіх прэміяў. Сёлета ўказу пра прэміі яшчэ не было.
Як прызначалі Зася
Больш за 10 гадоў генэральным сакратаром АДКБ працаваў прадстаўнік Расейскай Фэдэрацыі Мікалай Бардзюжа. Пасьля таго, як ён пайшоў у адстаўку, было вырашана, што ў далейшым на пасаду генсака будуць прэтэндаваць прадстаўнікі ня толькі Расеі. Першым за ім быў прызначаны прадстаўнік Армэніі Юры Хачатураў.
Пасьля таго, як у Армэніі адбыліся масавыя пратэсты і зьмянілася ўлада, армянскі бок адклікаў кандыдатуру Хачатурава, абвінаваціўшы яго ў супрацьпраўных дзеяньнях падчас працы на пасадзе ў Ерэване. Гэта адбылося ў лістападзе 2018 году.
Менск настойваў на тым, што генэральным сакратаром АДКБ павінен стаць Зась. Чуткі пра гэта хадзілі прынамсі зь вясны 2019 году. Беларускую кандыдатуру ўзгаднілі Кіргізстан, Казахстан, Таджыкістан і Расея.
Супраць кандыдатуры Зася выступала Армэнія, якая лічыла, што генсакратаром па-ранейшаму мусіць стаць іх прадстаўнік. Але ў траўні Армэнія пагадзілася на Зася.
