Справа аб двайным забойстве ў Стоўпцах. Вярхоўны суд разгледзеў скаргу абвінавачанага

Ранейшы прысуд пакінулі бязь зьменаў. Перагляду дамагліся бацькі абвінавачанага ў забойствах падлетка Вадзіма М.

Разгляд скаргі на прысуд Вадзіму М. адбыўся ў пятніцу 20 сьнежня. Як і асноўны працэс, ён адбываўся ў закрытым рэжыме. Журналістам дазволілі прысутнічаць толькі на абвяшчэньні выніку. Акрамя бацькоў Вадзіма М., на разгляд прыехалі таксама родныя загінулай настаўніцы — сястра Алена і сын. Самога Вадзіма ў залі не было.

Вярхоўны суд вырашыў пакінуць вынесены Менскім абласным судом прысуд бязь зьменаў.

ГЛЯДЗІЦЕ ТАКСАМА:

«Атрымае максымум 10 гадоў». Рэпартаж са Стоўпцаў напярэдадні суду ў справе аб двайным забойстве

Прысуд Вадзіму М. (13 гадоў калёніі і 110 тысяч рублёў кампэнсацыі для сямʼі забітай настаўніцы) Менскі абласны суд вынес 11 верасьня 2019 году (забойства адбылося 11 лютага 2019-га).

ГЛЯДЗІЦЕ ТАКСАМА:

Сын загінулай настаўніцы пасьля прысуду Вадзіму М.: «Што яму перашкодзіць паўтарыць гэта зноў?»

Разгляд справы пачаўся 19 жніўня, працэс праходзіў у закрытым рэжыме. Падчас судовых спрэчак дзяржаўны абвінаваўца папрасіў пакараць Вадзіма М. зьняволеньнем на 13 гадоў. Вядома таксама, што абвінавачаны прызнаў сваю віну часткова. У выніку суд даў Вадзіму М. пакараньне ў выглядзе 13 гадоў калёніі.

Суд таксама пастанавіў спагнаць 110 тысяч рублёў кампэнсацыі для сямʼі забітай настаўніцы.

Вадзіма М. абвінавачвалі ў злачынствах, прадугледжаных:

• ч. 3 арт. 339 (хуліганства з выкарыстаньнем зброі);
• пп.1, 6, 13 ч. 2 арт. 139 (забойства дзьвюх і больш асобаў з асаблівай жорсткасьцю з хуліганскіх матываў);
• ч.1 арт.14 (спроба злачынства);
• пп.1, 6, 10, 13 ч. 2 арт. 139 (забойства дзьвюх і больш асобаў з асаблівай жорсткасьцю з хуліганскіх матываў і забойства асобы ў сувязі з выкананьнем ёю службовых абавязкаў).

Сталі сьведкам падзеі? Зьнялі эксклюзіўнае фота ці відэа? Дасылайце ў Тэлеграм нашаму рэдактару

@SvabodaBelarus Ананімнасьць гарантуем