15 сьнежня каля расейскага консульства ў польскім горадзе Шчэціне адбыўся пікет за незалежнасьць Беларусі, супраць паглыбленьні інтэграцыі з Расеяй, а таксама ў падтрымку беларускіх палітвязьняў.
Як паведаміў Свабодзе суарганізатар пікету Францішак Цярэшка, удзельнікі акцыі прайшлі цэнтральнымі вуліцамі Шчэціна.
«Акцыя была скіраваная за незалежнасьць, супраць так званай інтэграцыі, якая мае на мэце зьнішчэньне незалежнасьці Беларусі! Таксама мы салідарныя з палітвязьнямі: Пятром Маркелавым, які атрымаў 14 содняў за выкрыцьцё факту фальсыфікацыі парлямэнцкіх выбараў у Беларусі. Таксама за Нааму Ісахар, ізраільцянку, незаконна выкрадзеную і арыштаваную расейскімі ўладамі», — расказаў Францішак Цярэшка.
Паводле другога суарганізатара акцыі Антона Койпіша, акцыю пачалі каля будынка, дзе месьціўся расейскі кансулят у Шчэціне (напярэдадні акцыі на ім вісела адпаведная шыльда, але незадоўга да акцыі яна зьнікла). Далей удзельнікі акцыі прайшлі шчэцінскімі вуліцамі ў бок польскай ваяводзкай управы, каб давесьці ўладам і польскаму народу аб інтэграцыі Беларусі з Расеяй.
Падчас акцыі яе ўдзельнікі раздавалі мінакам улёткі «Za naszą i waszą wolność», скандавалі заклікі: «Mińsk-Warszawa — wspólna sprawa», Жыве Беларусь, сьпявалі нацыянальныя гімны «Пагоня» і «Магутны Божа».
15 сьнежня пікеты беларусаў супраць паглыбленай інтэграцыі Беларусі з Расеяй адбыліся таксама ў Нью-Ёрку і Кракаве.
У Беларусі 15 сьнежня пікет супраць паглыбленьня інтэграцыі прайшоў у Горадні. Акцыя сабрала каля сотні чалавек. У Менску чарговая акцыя заплянаваная на 20 сьнежня.
«Паглыбленьне інтэграцыі» Беларусі і Расеі. Што важна ведаць
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»
