Ці праўда, што ў Беларусі сьмяротнасьць немаўлятаў ніжэйшая, чым ва ўсіх суседзяў?

Насамрэч

Чыстая праўда.

Гэта вынікае са справаздачы за 2018 год агенцтва ААН па ацэнцы дзіцячай сьмяротнасьці. У справаздачы прыводзяцца дадзеныя па сьмяротнасьці немаўлятаў у сьвеце ў 2016 годзе. Сьмяротнасьць немаўлятаў — гэта колькасьць выпадкаў сьмерці дзяцей ва ўзросьце да аднаго года на 1000 народжаных жывымі. У гэтую колькасьць у Беларусі трапіла і дзіця, якое загінула ад прышчэпкі летась у Ганцавічах.

Адпаведны паказьнік сьмяротнасьці немаўлятаў у Беларусі склаў 2.9 (29 сьмерцяў на працягу году жыцьця на 10000 народжаных жывымі дзяцей). У Латвіі гэты паказьнік складаў 3.9, у Польшчы — 4, у Літве — 4.3, у Расеі — 6.6, ва Ўкраіне — 7.8.

У Беларусі гэты паказьнік дакладна такі ж, як у Аўстрыі.

Паказьнік сьмяротнасьці немаўлятаў вышэйшы, чым у Беларусі, у такіх краінах, як Нямеччына (3.2), Францыя (3.2), Вялікабрытанія (3.7), ЗША (5.6).