На пленарным пасяджэньні Эўрапарлямэнту ў Страсбуры 26 лістапада адбылася цырымонія ўручэньня прэміі імя Андрэя Сахарава ўкраінскаму рэжысёру і актывісту Алегу Сянцову, нядаўна вызваленаму з расейскай калёніі.
Выступаючы перад дэпутатамі Эўрапарлямэнту, Сянцоў сказаў, што разглядае прэмію не як узнагароду для яго асабіста, але і для ўкраінскіх палітвязьняў у Расіі, у кантраляваных сэпаратыстамі раёнах Данбасу, а таксама для ўкраінскіх актывістаў і вайскоўцаў.
Прэмія Сахарава — галоўная ўзнагарода Эўразьвязу ў галіне правоў чалавека — была прысуджана Сянцову ў мінулым годзе, калі ён знаходзіўся ў зьняволеньні ў расейскай калёніі. Сянцоў, які жыў у Крыме, пасьля анэксіі паўвостраву быў арыштаваны расейскімі ўладамі і асуджаны на 20 гадоў пазбаўленьня волі па абвінавачваньні ў падрыхтоўцы тэрактаў. Ён адмаўляў віну, сьцьвярджаючы, што яго і яго таварышаў перасьледуюць за праўкраінскую пазыцыю.
Асаблівую вядомасць, у тым ліку ў Эўропе, яму прынесла галадоўка, якую ён трымаў у мінулым годзе з патрабаваньнем вызваліць ўкраінскіх палітвязьняў у Расеі. Міжнародныя праваабарончыя арганізацыі прызналі Сянцова вязьнем сумленьня.
Эўрапарлямэнт вырашыў прысудзіць яму прэмію імя савецкага акадэміка і дысыдэнта Андрэя Сахарава «ў знак прызнаньня яго мірнага пратэсту супраць незаконнай акупацыі ягонага роднага Крыму».
Прэмію «За свабоду думкі» імя Андрэя Сахарава штогод уручае Эўрапарлямэнт. У 2006 годзе гэтай прэміяй быў уганараваны былы кандыдат у прэзыдэнты Беларусі Аляксандар Мілінкевіч.
