Позна ўвечары блогер Уладзімер Цыгановіч, вядомы як MozgOn, паведаміў, што ў Гомелі затрыманы відэаблогер Сяргей Ціханоўскі, аўтар папулярнага ютуб-каналу «Краіна для жыцьця». Але праз паўгадзіны пасьля гэтага Ціханоўскі апублікаваў зварот да сваіх падпісчыкаў.
— Мяне паўгадзіны таму набраў Сяргей Ціханоўскі і сказаў, што на яго выходзілі супрацоўнікі міліцыі. Спачатку прыходзілі дадому да яго мамы, потым сустракалі яго каля ягонага дому. Мы дамовіліся, што будзем стэлефаноўвацца. Апошняе, што я бачыў, гэта калі ён запусьціў стрым і яго затрымалі. Тэлефон не адказвае. - напісаў Цыгановіч.
Свабода спрабавала скантактавацца з Сяргеем Ціханоўскім, але ягоны тэлефон недасяжны. Блогер жыве ў Гомельскім раене. У РАУС Гомельскага раену адказваюць, што такога чалавека ў іх няма.
Цыгановіч дадаў, што яму таксама тэлефаналі, прадставіўшыся з пракуратуры, і хацелі зь ім паразмаўляць. Але Цыгановіч папрасіў накіраваць афіцыйны ліст, як належыць па законе. Блогер выказаў меркаваньне, што гэта зьвязана зь яго дзейнасьцю. Ён заклікаў жыхароў Гомеля тэлефанаваць у мясцовыя пастарункі, каб даведацца пра ягоны лёс.
Амаль за гадзіну да меркаванага затрыманьня Ціханоўскі выйшаў у жывы эфір і распавёў пра перасьлед і магчымае затрыманьне.
Аднак неўзабаве пасьля гэтага на профілі Сяргей Ціханоўскі патлумачыў, што разам з падпісантамі яму ўдалося памяняць машыну і пазбавіцца ад тэлефонаў.
«Не хвалюйцеся за мяне. Я ў бясьпецы».
6 кастрычніка Ціханоўскага затрымоўвалі пасьля акцыі Мікалая Статкевіча на плошчы Свабоды ў Менску. Блогер вёў стрым з акцыі. Яго абвінавацілі ў парушэньні правілаў дарожнага руху.
