Дзяржпрамнагляд выдаў станоўчае заключэньне аб адпаведнасьці праекту, патрабаваньням бясьпекі, эксплюатацыйнай надзейнасьці кітайскага «сьмярдзючага» заводу ў Сьветлагорску.
Актывісты кампаніі маніторынгу сытуацыі з заводам абураныя такім заключэньнем.
«Рознакаляровы дым над новым заводам вісіць, людзі душацца ад смуроду, толькі ў чыноўнікаў усё добра», — зазначыла актывістка кампаніі, праваабаронца Алена Масьлюкова.
Гомельскае абласное ўпраўленьне МНС паведамляе, што дзяржаўныя інспэктары абсьледавалі абсталяваньне на новым заводзе, катлы, ліфты, сыстэмы газазабесьпячэньня і газаспажываньня.
«Дзякуючы правядзеньню на сыстэмнай аснове папярэдняга нагляду на ўсіх этапах рэалізацыі інвэстыцыйнага праекту праца ў ліквідацыі парушэньняў і недахопаў была завершана ў самыя кароткія тэрміны», — паведамляе ведамства.
Разам з тым Сьветлагорскі цэлюлёзна-кардонны камбінат, які рыхтуецца да запуску пасьля скасаваньня дамовы аб будаўніцтве з кітайцамі, яшчэ ў верасьні быў не распрацаваўшы мэтодыкі выкананьня вымярэньня шкодных выкідаў. Гэта вынікае з дакумэнту, копію якога атрымала Свабода.
Камбінату было даручана да 20 верасьня вызначыць «рэальны тэрмін выкананьня работ у распрацоўцы мэтодык выкананьня вымярэньня рэчываў, якія забруджваюць паветра, і прамысловых выкідаў».
«Як у 2017 годзе быў смурод, так і цяпер ён стаіць. І сёньня я бачу над заводам рознакаляровы дым, а жыхары вёскі Якімава Слабада скардзяцца на невыносны смурод. Мы напісалі дзясяткі зваротаў ва ўсе інстанцыі, але атрымліваем толькі адпіскі. Мы чыноўнікаў папярэдзілі — кожны, хто ставіць подпіс пад дакумэнтамі, якія тычацца заводу, будзе несьці пэрсанальную адказнасьць, калі на прадпрыемстве нешта здарыцца», — пракамэнтавала Свабодзе Алена Масьлюкова.
15 кастрычніка група актывістаў зьбіраецца ісьці на прыём да генэральнага дырэктара цэлюлёзна-кардоннага камбінату Юрыя Крука.
«Тыя, хто працуе на заводзе, кажуць, што там увесь час нешта выходзіць са строю, увесь час ідуць рамонтныя работы — і гэта на новым заводзе! Чыноўнікі нас супакойваюць, што „ўсё добра“, а людзям немагчыма жыць ад смуроду. Калі ж чыноўнікі зразумеюць, якога монстра яны пабудавалі?» — дадала праваабаронца.
Што важна ведаць пра завод беленай цэлюлёзы пад Сьветлагорскам
- У 2012 годзе ў Сьветлагорску сабралі больш за 10 тысячаў подпісаў супраць новага будаўніцтва, але праект быў распачаты.
- Смурод у Якімавай Слабадзе і Сьветлагорску пачалі адчуваць у лістападзе 2017 году пасьля першых пусканаладачных работ.
- Кіраўніцтва заводу сьцьвярджала, што выкіды не аказваюць нэгатыўнага ўплыву на здароўе, аднак пасьля дзясяткаў скаргаў ва ўсе структуры ўлады ад мясцовых жыхароў, прызнала, што «газы з кепскім пахам» — мэтыльмэркаптаны. Пусканаладачныя работы былі прыпыненыя.
- 25 сьнежня 2017 году жыхары вёскі Якімава Слабада выйшлі на пратэст, патрабуючы вырашыць праблему са «сьмярдзючым заводам».
- 7 ліпеня 2018 году ААТ «Сьветлагорскі цэлюлёзна-кардонны камбінат» пачаў пусканаладачныя працы на вытворчасьці беленай цэлюлёзы. У тэрыторыю санітарна-абарончай зоны не патрапілі дачныя ўчасткі і сельскагаспадарчыя надзелы.
- 15 верасьня мясцовыя жыхары зноўку выйшлі на пратэст у Сьветлагорску супраць выкідаў з кітайскага заводу.
- Вытворчасьць беленай цэлюлёзы нясе выкіды мэтыльмэркаптану, які ў вялікіх дозах можа выклікаць сьмерць.
- За 20 мэтраў ад заводу знаходзяцца парнікі Сьветлагорскай агароднінай фабрыкі, якая не ўключана ў санітарна-абарончую зону.
- За 350 мэтраў — вёска Якімава Слабада, яе ў ахоўную зону ўключылі.
- Меркавалася, што новы завод забясьпечыць патрэбы ўнутранага рынку і будзе вырабляць беленую цэлюлёзу на экспарт. Першапачаткова праект ацэньваўся на 700 мільёнаў даляраў. Амаль усе грошы атрыманыя з кітайскага крэдыту. Будаўнікі таксама кітайцы — кампанія САМСE.
Канцэрн «Белляспаперпрам» запэўнівае, што запуск вытворчасьці беленай цэлюлёзы «знаходзіцца пад кантролем». Пры гэтым у канцэрне адзначаюць, што ў тэрыторыю санітарна-абарончай зоны не патрапілі:
- тэрыторыі садаводчых таварыстваў і дачных каапэратываў;
- парнікі і адкрытыя надзелы Сьветлагорскай агароднінай фабрыкі;
- сядзібная жылая забудова вёскі Якімава Слабада.
«Зноў гэты смурод! Нас ратуе толькі моцны вецер». Пад Сьветлагорскам запускаюць кітайскі завод
У ліпені кіраўніцтва ЦКК абяцала, што будзе праводзіцца рэгулярны маніторынг экалягічнай сытуацыі ў раёне. Цяпер амаль штодзень на сайце Сьветлагорскага ЦКК разьмяшчаецца адпаведная інфармацыя, паводле якой выкіды не перавышаюць усталяваныя экалягічным заканадаўствам нормы (гранічна дапушчальныя канцэнтрацыі).
