Ці праўда, што інцыдэнт з гомельскай «настаўніцай з партай» — ня рэдкасьць у беларускіх школах?

Насамрэч

Чыстая праўда. Пра гэта сьведчаць вынікі леташняга агульнанацыянальнага дасьледаваньня па ацэнцы сытуацыі з гвалтам у адносінах да дзяцей у Беларусі.

Гэтае дасьледаваньне было зробленае пры спрыяньні Дзіцячага фонду ААН ЮНІСЭФ.

Падчас апытаньня, праведзенага ў межах дасьледаваньня (глядзі старонку 7 справаздачы), 8.6% навучэнцаў 5-7 клясаў установаў агульнай сярэдняй адукацыі адзначылі, што адносна іх ужывалася агрэсія з боку адміністрацыі школы і/альбо з боку настаўнікаў. У папярэднім аналягічным дасьледаваньні, якое праводзілася ў Беларусі ў 2007-2008 гадах, апісваліся практыкі, якія настаўнікі ўжываюць адносна сваіх вучняў (стар. 40): «Паводле ацэнак настаўнікаў, для дысцыплінаваньня дзяцей у школе яны і іх калегі ў асноўным выкарыстоўваюць пагрозы выклікаць у школу бацькоў, крык і лаянку, ствараюць сытуацыі, калі дзіця адчувае сорам у прысутнасьці іншых людзей, выстаўляюць на некаторы час у калідор, пагражаюць выгнаць дзіця са школы альбо адправіць у іншую школу, інтэрнат, спэцшколу для непаўнагадовых правапарушальнікаў, ставяць дзіця ў кут, пазбаўляюць увагі, ігнаруюць яго, а таксама цягаюць за вушы, могуць ударыць лінейкай, даць аплявуху або па карку, шлёпнуць або адцягаць за валасы».