У Буда-Кашалёўскім раёне 12 верасьня памёр 9-клясьнік, якога дырэктар школы павёз насустрач машыне хуткай дапамогі, піша Tut.by.
Паводле папярэдняй інфармацыі ад Сьледчага камітэту, дзевяціклясьніку ў школе зрабілася кепска, ён страціў прытомнасьць. Яму выклікалі хуткую дапамогу. У школе вырашылі не чакаць хуткай, знайшлі транспарт, і дырэктар павёз дзевяціклясьніка насустрач лекарам, піша Tut.by са спасылкай на супрацоўніцу школы.
Для высьвятленьня дакладнай прычыны сьмерці прызначылі судова-мэдычную экспэртызу.
Аднаклясьнікі нябожчыка сказалі Onliner.by, што, па адной з вэрсій, падлетка ўдарылі на вялікай перамене, калі паміж некалькімі хлапцамі адбылася спрэчка.
«Яны ў прыбіральню пайшлі, а што ў іх там атрымалася, ня ведаю», — сказала супрацоўніца школы.
Сябры кажуць, што нябожчык быў добрым хлопцам. У сямʼі, акрамя яго, яшчэ 5 дзяцей.
