Міністэрства абароны хоча дамагчыся павышэньня статусу выкладчыкаў дапрызыўнай падрыхтоўкі ў школах, каб тыя атрымалі кіраўнічыя паўнамоцтвы. Пра гэта на прэс-канфэрэнцыі 23 жніўня ў Мінску заявіў начальнік упраўленьня інфармацыі галоўнага ўпраўленьня ідэалягічнай працы Мінабароны Ўладзімер Макараў, піша БелаПАН.
Макараў заявіў пра прапанову павысіць статус выкладчыка дапрызыўнай падрыхтоўкі мінімум да намесьніка дырэктара. Ён таксама сказаў, што Мінабароны разглядае магчымасьць рэфармаваньня сыстэмы навучаньня ў арміі з разьлікам на тое, што ў школы вернецца практычная пачатковая ваенная падрыхтоўка.
