Гомельскі абласны суд на закрытым паседжаньні 15 ліпеня асудзіў 60-гадовага жыхара Добрускага раёну на 11 гадоў калёніі ўзмоцненага рэжыму за спробу забойства суседкі грамадзка небясьпечным спосабам.
Мужчыну прызналі вінаватым ня толькі ў спробе забойства, але і ў наўмысным пашкоджаньні чужой маёмасьці грамадзка небясьпечным спосабам (шкоду ацанілі ў 900 рублёў), незаконным вырабе і захаваньні выбуховай прылады. Прысуд яшчэ не набыў моц і можа быць абскарджаны.
Як раней паведамляў Сьледчы камітэт, мужчына казаў, што матывам злачынства была рэўнасьць.
Абвінавачаны сабраў бомбу ў сваім хляве з выкарыстаньнем прынамсі двух патронаў і бяздымнага пораху, пісала пракуратура. Увечары 15 верасьня 2018 году мужчына трапіў на тэрыторыю прыватнага дому сваёй суседкі ў вёсцы Насовічы, што пад Добрушам, паклаў на падваконьне самаробную бомбу і падарваў яе, схаваўшыся за рог дому. Пацярпеў 34-гадовы госьць гаспадыні, а яе самой у той час дома не было.
