Навукоўцы выявілі перавышэньне ўзроўню радыяцыі ў 100 тысяч разоў у раёне патанулай савецкай атамнай падводнай лодкі «Камсамолец» у Нарвэскім моры. Пра гэта паведаміў нарвэскі тэлеканал TV2 са спасылкай на кіраўніцу навуковай экспэдыцыі Хільду Элізу Хелдаль.
Паводле яе, проба, узятая ў панядзелак, з вэнтыляцыйнай трубы на падводнай лодцы, паказала радыяактыўны ўзровень, які ў 100 тысяч разоў вышэйшы, чым у звычайнай чыстай марской вады. Гэты ўзровень таксама вышэйшы, чым той, які расейскія дасьледчыкі вымяралі 12 гадоў таму.
Хільда Эліза Хелдаль сказала, што вынікі пробаў яшчэ будуць дасьледаваныя больш старанна. Паводле яе, радыяцыя з падводнай лодкі, якая знаходзіцца на глыбіні 1700 мэтраў, не стварае небясьпекі для шырэйшага навакольля.
Савецкая атамная падводная лодка К-278 «Камсамолец» патанула 7 красавіка 1989 году. У выніку пажару ў двух сумежных адсеках былі разбураныя сыстэмы цыстэрнаў галоўнага балясту, празь якія адбылося затапленьне лодкі забортнай вадой. Кіраўніцтва савецкага вайскова-марскога флёту вінаваціла ў недасканаласьці лодкі канструктараў і суднабудаўнікоў. Тыя, у сваю чаргу, заяўлялі пра няўмелыя дзеяньні экіпажу.
