Сёлета ва ўнівэрсытэт можна падаваць дакумэнты, калі ў цябе 10 балаў за ЦТ па беларускай мове. У Акадэмію міліцыі можна і з 7-ю баламі.
Нездавальняючыя адзнакі на 2019 год Міністэрства адукацыі вызначыла яшчэ ў сакавіку 2019 году.
«У наступным годзе парогавыя падвысім», — паабяцаў на прэсавай канфэрэнцыі 2 ліпеня дырэктар Рэспубліканскага інстытуту кантролю ведаў Юры Міксюк.
Сёлета нездавальняючымі адзнакамі Мінадукацыі прызнае наступныя:
- Ад 0 да 9 балаў (уключна) па беларускай і расейскай мове. Калі абітурыент паступае на філялягічны профіль, яму трэба набраць ня менш за 25 балаў.
- Ад 0 да 19 балаў па першым профільным прадмеце — матэматыка, фізыка, хімія, біялёгія; ад 0 да 24 балаў па першым профільным прадмеце — гісторыя Беларусі, усясьветная гісторыя, грамадазнаўства, геаграфія, замежная мова.
- Ад 0 да 9 балаў па другім профільным прадмеце — матэматыка, фізыка, хімія, біялёгія; ад 0 да 14 балаў па другім профільным прадмеце — гісторыя Беларусі, усясьветная гісторыя, грамадазнаўства, геаграфія, замежная мова.
Тым, хто паступае ў навучальныя ўстановы Міністэрства абароны, Міністэрства надзвычайных сытуацый, Памежнага камітэту і на вайсковыя факультэты, трэба набраць ня менш за 7 балаў па ўсіх прадметах.
